Волонтер – мемнан жапнан геройжо

Кеч-могай паша кумылаҥдалтшаш. Туге гынат пашалан окса але иктаж-могай поянлык дене ок тӱлалт. Кызытсе саманыште шке кумылын пашам ончыкташ тыршыше еҥ-влак улыт. Нуным волонтер-влак маныт.

Тый самырык улат да ты илышыште шке корнетым кычалат – тугеже волонтер лийын шкендым да шке пашатым ончыктен кертат. Поро пашам ыштен, тый тӱрлӧ паша усталыкым чумырет, проектлаште участвоватлет, шинчымашым да профессиональ мастарлыкым налат. Кӱлешан да поро пашам ыштыме годым тый ты але вес профессий нерген шинчымашым погет да тудым ончыкыжым ойырен налын кертат.

Волонтер нерген мый икымше гана 2013 ийыште кольым. Тунам школышто кугырак класслаште тунемше-влак ик мероприятийыште шке пашашт нерген каласкаленыт. Мый школышто «МЕ» волонтер-влак команде улмо нерген пален нальым. Тудо 2009 ий гыч шке кумылын поро пашам ыштыше толкын дене таза илыш-койышым пропагандироватла, илалше да моло еҥ-влаклан полша. Ту ийынак, мыланна, 6-шо классыште тунемше-влаклан «Поро паша» республике акцийыште участвоватлаш темленыт. Тыште сеҥыше-влак Уфа олаште республике У ий елкын участникше лийыт. Ме пушкыдо модышым, книгам погышна да приютышто илыше икшыве-влаклан пуышна, тыгак коррекционный школыш оҥай программе дене толынна, кугырак класслаште тунемше-влаклан Агытан ялыште памаш территорийым эрыкташ, класслаште пеледышым кушташ, изи йоча-влаклан весела переменым эртараш полшенна. Тылеч вара мый волонтер-влак нерген информаций-влакым кычалаш, нунын пашаштым шымлаш, тӱрлӧ мероприятий ден акцийлаште участвоватлаш тӱҥальым. Кунам мый 14 ийым темышым – волонтер лияш шонен пыштышым. Калтаса район МР администраций да Краснохолмский ялсовет администрацийын специалистше-влакын вуйлатымышт почеш ме, самырык-влак, тӱрлӧ деч тӱрлӧ акций ден программылаште участвоватлаш тӱҥална.

Тӱрлӧ ситуацийлаште икте-весе дене мутланымаш, проблемым кораҥдаш йӧным кычалмаш, икте-весым умылымаш да полшымаш, тӱшка дене пашам ыштымаш, пелен улшо еҥ-влак верч вуйын шогаш тунемына.

Школым тунем пытарымеке, мый умбакыжат волонтер толкынышто пашам ышташ шонем. Ончычсо семынак еҥ-влаклан полшынем да обществылан кӱлешан лийнем.

Валерия Мурашкинцева