Чын кочкыш – таза илышыш ошкыл

«Ме школлаште продуктын сайлыкше да тичмаш шокшо кочкышым ситарыме йодыш-влакым тӱткын текшырена. Регион вуйлатыше лийын пашам ышташ тӱҥалме годым Башкортостаныште школлаште икшыве-влакым начарын пукшеныт. Ме тидым тӱзатенна, системым ыштенна, тудыжо кызыт Российыште ик эн сайлан шотлалтеш. Вуйшиймаш уке, туге гынат ончыко каяш кӱлеш», – палемден Радий Хабиров.

Калтаса районышто ты направлений почеш кугу паша намиялтеш. Школлаште кочкышын качествыжым образований пӧлка, район администраций, тунемше-влакын ача-авашт текшыренак шогат. Районышто школлаште Виш омса кече чӱчкыдын эрта, кушто ача-ава-влак икшывыштым пукшымо кочкышым аклен кертыт. Школлаште кочмоверын ача-ава-влак гына огыл текшырат. Тушко район администраций вуйлатыше Забир Габдуллин шкежат лектын коштеш.

Ик школышто лиймыже нерген соцсетьыште шке страницыштыже тудо ойлен:  «Калтаса 1 №-ан школышто кочмоверыште лийым, кочаш шолтышо да тунемше-влак дене кутырышым. Чыла тамле манын,  каласеныт икшыве-влак, тарелке-влак яра кодыт. Кочкышым стандарт да меню почеш ямдылат».

Образований пӧлкан данныйже почеш, ты тунемме ийын районышто 2805 тунемшым шокшо кочкыш дене пукшат. Тӱҥалтыш классла гыч 910 тунемше тугок кочкеш, шуко икшыван да нужнан илыше ешла гыч – 242 йоча, инвалид да ОВЗ дене 235 икшыве да 53 йоча – СВО участникын икшывыже-влак. 2022 ий гыч чыла школлаште «Меркурий» ПТФ ООО муниципаль контракт негызеш шокшо кочкышым ямдыла.

Школ-влакын официаль сайтлаштыже эр кочкыш да кечывал кочкышым фотосӱрет дене пеҥгыдедыме меню вераҥдалтеш. Бракераж комиссий-влакын пашашт ышталт толеш, школ кочкыш системын пашажым ачан-аван терген шогымыжым организацийлыме. Виш омса кечын «Родители Башкортостана за здоровое питание» акций эртаралтеш. Тыгак таза кочкыш арня чӱчкыдын лиеда. Шокшо кочкышым организоватлыме условийым, темлымашым да замечанийым погаш манын, ВКонтакте социаль сетьыште «Школьное питание» группым ыштыме. Школысо кочмоверлаште пашам ыштыше-влак шке мастарлыкыштым кӱкшемдат, «Лучшая школьная столовая» да «Лучший школьный повар» республике конкурсын район этапыштыже участвоватлат. Тыге, 2023-2024 тунемме ийлаште Краснохолмский 2 №-ан школын кочмоверже эн сайлан шотлалтын, а эн сай повар тиде школынат кочкаш шолтышыжо М. Ахунова лийын.

Валентина Ибаева, Калтаса районын образований пӧлкан технологшо:

– Тунемше-влакым чын пукшымаш – тиде тазалыклан негыз, шинчымашым налаш да сай вияҥаш полша. Йоча, поснак кушмыж годым чыла пайдале веществам налшаш. Кочкышышто белок, витамин, минерал элемент-влак ситышын лийшаш улыт.  Сандене школ менюм СанПиН-ын йодмашыж почеш келыштарен ыштыме.

Мутат уке, школышто шолтымо кочкышым чыла огыл икшыве кумыл шуын кочкеш. Тыште икшывын мом кочкаш йӧратымыже, ешыште мом шолтымо кугу рольым модеш. Тунемше-влак мӧҥгӧ гыч кондымо чипсым, газировкым, шоколадым кочкыт гын, нунылан шӱрым але пучымышым пукшаш неле. А вет пытартышышт ятырлан пайдале. Ача-ава-влакын личный примерышт деч посна икшывым чын да таза пукшымашке кусараш неле. Сандене мый Башкирий вуйлатыше дене Вияш линийыште йоча кочкышлан лӱмдалтше образований проектым ыштыме нерген темлымашым сайлан шотлем.

Светлана Аркадьева