Районын пасулаштыже кажне кечын паша шукырак ышталтеш

Районын пасулаштыже кажне кечын паша шукырак ышталтеш. Ятыр озанлык вӱдыжгым петырымаште да шукияш шудым тырмалымаште тырша.

ИКЦ-ын данныйже почеш, 22 апрельлан Савакмарий ялыште Василий Зайникаевын кресаньык-фермер озанлыкыштыже нине пашам кумдыкын 80 % шуктымо. Озанлыкыште вӱдыжгым петырымаште да шукияшым тырмалымаште механизатор-влак Алик Николаев ден Виктор Иргибаев удан огыл пашам ыштат.

«Восход» СХК-ште 200 гектар кумдыкышто вӱдыжгым петырыме, тыгай кумдыклаштак шукияш шудым тырмалыме. Озанлыкыште тыгак кокияш культура-влакым минерал ӱяҥдыш дене подкормкым ыштат. 22 апрельлан тиде сомылым 100 гектарыште шуктымо.

«Победа» ООО-ын Кугу Качакысе производственный участкыштыжат кугу кумдык-влакым обработатлыме. Тыште 250 гектарыште вӱдыжгым петырыме, шукияш шудым 650 гектарыште тырмалыме. Озанлыкын пасулашкыже культиваторный агрегат-влакымат лукмо. Изи Качак ял воктене кечывалвелым пасушто эше эртыше арнян вӱдыжгым петыреныт, а 22 апрельлан культиваций деч вара шӱльым ӱдаш палемденыт. Мемнана газетнан номерже лекме жаплан озанлыкыште икымше гектарлаште икияш культурым ӱдаш тӱҥалме лиеш.

Бикмурзин, Биктимиров, Мухамадиев, Яшкин, Шуматбаев озанлыклаштат паша шолеш.