Сарын участникше-влак деке врач-влак толыныт

Тиде паша «Территория заботы» федераль проект почеш эрта. Тыгай проект икмыняр регионышто пилот проект семын колталтын. Тушко мемнан республикат пура. Тиде программын тӱҥ задачыже – илалше еҥ-влаклан сай медполшым ончыктымаш.

Проект эртыме жапыште эмлымверлаште гериатрий пӧлка-влак пашам ышташ тӱҥалыныт, а поликлиникылаште – гериатрий кабинет-влак. Калтаса район Янаул эмлымверын обслуживатлыме зонышко пура. Тудын специалистше-влак чӱчкыдын Калтаса районыш илалше еҥ-влакын тазалыкыштым тергаш лектын коштыт. Кодшо арнян Янаул ола гыч медик-влак тыгай текшырымашым эртареныт. Калтаса эмлымверын поликлиникыштыже тылыште тыршыше, Кугу Отечественный сарыште колышо салтак-влакын тулык ватыштым тергеныт. Кугу Отечественный сарыште лийше ныл участник деке мӧҥгышкышт миеныт. Нунын кокла гыч иктыже, райрӱдыштӧ илыше 92 ияш ветеран – Мударис Гатиянович Мисбахетдинов. Шуко илалше еҥлан пӧрт гыч лекташ неле, а эмлымверыш миен шумо нерген ойлыманат огыл. Мударис Гатиянович шӱлыкаҥын шарналтен ойла, вет жапыштыже тудо ик километрым гына ошкыл эртен огыл. Фронтовик, Венгрий ден Чехословакийым немыч-влак деч утарыше салтак, Сеҥымаш деч вара флотышто служитлен, вара шуко ий Калтаса школышто трудым туныктен, тудо нигунамат паша деч посна шинчен огыл. 2018 ий марте тудо шкетын илен. Кызыт тудым Таслима ӱдыржӧ онча. Шкетын илен гынат, тудын пӧртыштӧ кеч-кунамат ару да волгыдо лийын. А кызыт ий-влак, содыки шкеныштыным налыт, сандене ветеран-влаклан тыгай медтекшырымаш-влак кӱлыт. Илалше еҥ-влаклан тӱткылык моткоч шерге.

Кузе врач гериатр А.Л. Чебан умыландарыш, ветеран-влакым текшырыме да ончымо деч вара нунылан тӱрлӧ рецепт, темлымаш-влакым серен пуат.

– Мемнан пашаштына эн тӱҥжӧ – ветеран-влакын илышыштым кужемдаш тыршымаш, – увертарыш Алевтина Леонидовна.

– Кугу Отечественный сарын ветеранже, тылыште тыршыше, сарыште колышо салтак-влакын тулык ватышт-влак – мемнан поснак шымлыме пациентна улыт, нуным мемнан поликлиникысе терапевт-влак тергенак шогат, нунын деке Янаул эмлымверын гериатрий пӧлкан специалистше-влак чӱчкыдын миен коштыт, – каласыш Калтаса эмлымверысе поликлиникын вуйлатышыже Х.Ф. Абзалов. – Сеҥымаш кече лишемеш, Калтаса районышто илыше Кугу Отечественный сарын чыла участникшым медик-влак мӧҥгышкышт миен тергеныт.