1 №-ан Калтаса кыдалаш школын тунемшыже Марк Чулков шымлыме паша шотышто республике конкурсын призержо лийын

Таче обществыште кугу вашталтыш-влак лийын шогат. Сандене айдемылан кеч-могай сферыштат шке проблемыжым решатлаш тунемман, икманаш, чылалан ямде лияш да ончылан шындыме цельыш шуаш тыршаш кӱлеш. Айдемын тыгай койышыжо-влакым пеҥгыдемдаш шымлыме паша кугу полышым ончыкта. Йоча шочмыж годсекак шке але ача-ава полшымо дене чыла шымлаш тӱҥалеш, ме тудым эн кӱлешанлан туныкташ тыршена. А йочан гын чыла палымыже шуэш, сандене тудлан полыш кидым шуялтыман. Лач тыгай задачым шке ончыланышт шындат 1 №-ан Калтаса кыдалаш школын туныктышыжо-влак.

5 апрельыште Салават олаште шымлыме паша шотышто республике конкур эртен. Тыште республикын ола ден районлаже гыч 1 гыч 11 класслаште тунемше 306 самырык шымлызе участвоватлен.

Мемнан районын чапшым тиде конкурсышто 1 №-ан Калтаса кыдалаш школын 2-шо классыште тунемшыже Марк Чулков арален.

Мероприятийын пайрем ужашыже УГАНТУ Салават оласе филиалжын погынымаш-влак залыштыже эртен. Тыште заочный этапын призержо ден сеҥышыже-влак погыненыт. Погынышо-влак ончылно Салават оласе образований управленийын вуйлатышыже Ф.Я. Хабибуллина ойлыш.

Пайрем ужаш деч вара чыла участник секцийла мучко шаланыш. Марк «Научных открытий заманчивый мир» секцийыште «Математика» направленийым ойырен налын. Тыште чылаже 18 паша лийын. Кучедалмаш тале да неле лийын, чыла участник виян да шке пашаштым аралаш чыла шотыштат ямде лийыныт.

Маркын пашаже «Занимательный материал по математике с элементами краеведения» манылтын. Тудын шымлыме материалже – Башкортостан Республикылан 100 ий темме вашеш лукмо сборник. Тиде сборникыш 25 оҥай материал пурен, чылажат Башкирий ден кылдалтше лийын. Жюри пашам кӱкшын аклен да конкурсын результатше деч вара Марк II-шо степенян дипломым сеҥен налын.

Самырык шымлызе шкенжын районжын чапшым веле огыл сайын арален, тыгак вес районысо да олаласе школышто тунемше-влак дене палыме лийын, могай проект-влак почеш нуно пашам ыштат пален налын.

Ме Маркым уло кумылын сеҥымаш дене саламлена да ончыкыжымат сеҥаш гына тыланен кодына.

Р. Юсупова