Савакмарий ял гыч механизатор Алик Николаев ӱдымӧ пашам сай кумыл дене шукта

Яллаште шошымсо тургым жап тӱҥалын, тудын кузе эртымыж деч, ялозанлык культура-влакын сай лектышышт шога. Кызыт кугу паша пасулам обработатлыме да ӱдымӧ паша механизатор-влакым вачӱмбакышт пышталтын. Культурын нӧшмыжӧ вӱдыжгӧ пеш поян мландыш вочшо да сай нерешт лекше манын, чыла технологический мероприятийым жапыштыже эртарыман. Сандене шошо-пасу паша нунылан тургым жап. Кызыт механизатор-влак эрдене эр гыч кас пычкемыш марте нойымым шотыш налде пасулаште тыршат.

Алик Анатольевич Николаев – Савакмарий ял гыч Зайникаев кресаньык-фермер озанлыкын механизаторжо улеш. Тудо вӱдыжгым петырымашке тырмалыме агрегат-влакым ты озанлыкыште ик эн ончыч луктын. Тиде 16 апрельыште лийын. Тудо Виктор Иргибаев дене пырля уда огыл темп дене чыла 300 гектар кумдыкышто арня жаплан вӱдыжгым петыреныт. Кызыт культиваций деч вара ӱдымӧ пашам намият. Озанлыкыште тений 150 гектарыште шожым, 100 гектарыште шыдаҥым да 50 гектарыште пурсам ӱдаш палемдалтеш.

Алик Николаев 20 ий утла механизатор лийын пашам ышта, тиде школышто эше тунеммыж годым комбайнерын полышкалышыже лийын тыршымыжым шотыш налаш гын.

Тудо уста комбайнер Афанасий Ибаевич Иргибаевын вуйлатымыж почеш профессийым шымлаш тӱҥалын. Мут томашеш, Виктор Иргибаев, кызытсе пасу пашаште Алик Николаевын напарникше, тудын изирак шольыжо. Киндым ончен куштышо династийым ончыч яллаште чӱчкыдын вашлияш лийын.

2000 ийыште школым тунем пытарымыж деч вара Алик Николаев кумда профилян механизаторлан тунем лектын да трактор дене пашам ышташ тӱҥалын. Тунам эше Савакмарий ялыште «Урал» озанлык лийын. Чыла сезон пашалаште участвоватлен: шошым – тырмален, ӱден; шыжым – олымым поген, куралын. Кӱлеш годым комбайнын штурвалже воктекат шинчын. Тудлан ӱшанен пуымо технике кеч-кунамат тӱз лийын. Жапыштыже техончымашым ыштен, кӱлеш гын, олмыктен.

– Пасушто паша мийыме жапыште трактор ден агрегатын пудыргымашыже моткоч шергеш возеш, – ойла Алик Анатольевич. – Жап эрта, тидыже лектышлан чаракым ышта. Сандене мый паша жапыште технике ынже пудырго манын, тудым сай ямдылаш тыршем.

Савакмарий ялыште «Урал» озанлыкын банкротыш савырнымыже да тудым пытарыме деч вара икмыняр фермер-озанлык ышталтын. Тушто уста механизатор-влак чылалан кӱлыныт. Сандене Алик Анатольевич паша деч посна шинчен огыл. Пытартыш ныл ий тудо Василий Зайникаевын КФО-жо тырша. Тиде озанлык удан огыл вияҥеш. Кушкылым ончен куштымаште, шыл ден шӧрым ыштен налмаште пашам ышта. Алик Николаеват тудым вияҥдымашке шке надыржым пышта.