Шоръял воктене пасу ден йыр улшо пӱртӱсым шӱкленыт

Пагалыме лудшына-влак, печататлыме снимкылаште те Шоръял да Киябак ял-влак коклаште несанкционированный свалкым ужыда. Кок яллаште илыше калык тышке шӱкшакым шупшыкта. Тидым годым кутырен келшен огытыл. Ик гана ала-кӧ дыр тышке шӱкшым кудалтен, тидым ужан моло-влакат тышке шупшыкташ тӱҥалыныт.

Ты свалкыш мемнам «Мельник» ООО-ын директоржо Любомир Акушев кондыш. Озанлыкыш ме ялозанлык пӧлкан комиссийже дене кокияш культура-влакын кошкымыжым активироватлаш толынна ыле. Киябак велым несанкционированный свалке шукияш шудо деке ушна, а Шоръял велым – куралме пасу. Нунын гоч ял калык шке шӱкшакшым шупшыкта, корным тошка. Шӱкшак гыч пасу мардеж полиэтилен пакетым, пластик шишам шалата.

– Теҥгече гын ме вӱдыжгым петырышна, тырмалышна, а таче, ончалза, адакат пасушто полиэтилен пакет-влак ош лум гай койын кият, – ончыкта мыланна Акушев. – А теве автомашина деч корно, тырмалыме деч вара пасу гоч кудал лектыныт. Теҥгече касвелеш але кастене ала-кӧ дыр тышке шке шӱкшым конден. Чыланат тышке шупшыктат, пасу ден посадкым шӱклат. Краснохолмский ялсовет вуйлатыше Цедилкин, тудын алмаштышыже Шакиров деке тиде несанкцонированный свалкым пытараш манын, йодын миенна. Мутым гына пуат, но нимат ок шукталт.

Мемнан тушто лиймына годым Киябак ял гыч ик еҥ ты свалке деч мотоблок дене кая ыле. Посадке воктене шӱкым кудалтымыж нерген каласыш, йошкаргенак кайыш. Вожылтараш арамыш миен лектеш, а наказатлаш нимогай правашт уке.

– А кушто вара шӱкшакым кышкаш? – тушто йодышланна йодышым пуыш. – Мемнан дене ялыште шӱкшакым кышкыме вер, ни площадке, ни контейнер уке.

Тиде кечын Кугу Качак ялсоветыште Качкин-Турай ялыште шӱкшакым кышкыме проблеме дене вашлиялтна. Тыште ял покшелне, пӱя воктене, площадкым печыме, кум контейнер шога. Но молан дыр унчыливуя.

– Площадкым ыштенна, контейнер-влакым шогалтенна, а шӱкшакым нигӧ ок наҥгае, – ойла «Победа» ООО-н Кугу Качакысе производственный бригадын вуйлатышыже Назиф Абдуллин. – Уло ял калык шӱкшакым кышкаш тӱҥале, контейнер-влак вашке темын шинчыч, вара шӱкшакым контейнер воктеке кышкаш тӱҥальыч. Ял покшел шӱкшакым кышкыме верыш савырныш. Мардеж урем мучко шӱкшакым наҥгая. Чыла погымо шӱкшакым трактор орваш пышташ да ончычсо свалкыш наҥгаяш да йӱлаташ логале. А эше мом ышташ ыле.

Кок тӱрлӧ икгай ситуаций. Тиде икгана ончалмаште гына. Районысо чыла вере тыгак манаш лиеш. Шӱкшак дене кылдалтше йодыш чыла ялсоветыштат пӱсӧ лийын кодеш.

Туге гынат, район калык кажне тылзын шӱкшаклан тӱлашлан квитанций-влакым налынак шога. Тудым Киябакыштат, Шоръялыштат, Качкинтурайыштат налыт. Услугым ончыктымылан тӱлаш йодыт. Тыгайже мемнан элыште гына лийын кертеш, очыни.