Кӧтерем кыдалаш школышто районысо тунемше-влак коклаште шахмат дене модмаш эртен

Кӧтерем кыдалаш школышто интеллектуаль модмаш дене модаш йӧратыше-влак коклаште район турнир эртен. Тудо Сеҥымаш кечылан лўмдалдалтын лийын. Шем-ошо пасулаште районын вич школжо вашлиялтыныт, тиде 40 утла тунемше.

Шеревам кучымаш деч вара самырык спортсмен-влак модмо ўстел воктене верлам налыныт. Судьян сигналже почеш таҥасымаш тўҥалын. Шахмат дене модмаште вашкыман огыл, тыште чыла шонкален-вискален ыштыман. Йырваш шып. Фигура-влакым тарватыме йўк гына шокта.

Модмаш мучашлалте. Таҥасымашым иктешлымеке тыгай верлам шеледеныт:

2008 ийыште шочшо да изирак ўдыр-влак коклаште икымше верым Ижбулатова Вероника (Ӱлыл Качмаш КШ) налын, 2 №-ан Калтаса КШ гыч Диана Закирова кокымшо лийын, Кӧтерем КШ гыч Дина Акчурина – кумшо. Эрге-влак коклаште Марий Мераҥ тичмаш огыл кыдалаш школ гыч Трофим Гайнуллин икымше верыш лектын, кокымшо – Ӱлыл Качмаш КШ гыч Никита Петров, ты школ гычак Егор Яндуганов кумшо верыш лектын. 2005-2007 ийлаште шочшо ўдыр-влак коклаште Кӧтерем кыдалаш школын тунемшыже-влак сеҥеныт. Тиде Калиева Аделина, Шуматбаева Ульяна, Виктория Паршина. Эрге-влак коклаште Михаил Петров ончыко лектын, Ярослав Александров кокымшо верым налын, Артур Насипуллин – кумшо. 2004 ийыште шочшо да кугырак ўдыр-влак коклаште Михайлова Лилия икымше лийын, Изибаева Кристина кокымшо верыш лектын. Нуно коктынат Ӱлыл Качмаш КШ гыч улыт. Кумшо – 2 №-ан Калтаса КШ гыч Лаврентьева Кристина.

Эрге-влак коклаште икымше да кокымшо верым Кӧтерем КШ гыч тунемше-влак пӧленыт – Арсений Файзуллин ден Максим Парфенов. Кумшо – 2 №-ан Калтаса КШ гыч Митрофанов Илья.