9 майыште Россий мучко да мемнан дене, Калтаса районышто, Кугу Сеҥымашлан 74 ий теммылан лӱмдалтше мероприятий-влак эртеныт

Кугу Сеҥымаш кечым ме кугешнымаш дене вашлийына. Лач 9 май кечын гына мемнан элнан уремлаштыже да площадьлаштыже тынар шуко калык чумырга. Тиде сар да Сеҥымаш нерген шарнымаш чылаштымат иктыш уша.

9 май эрдене кече ояр, шокшо да мотор ыле. Чынжымак майысе пайрем кече. Калтаса селасе рӱдӧ урем дене «Бессмертный полк» колонно эртен. Калтаса кыдалаш школын тунемшыже, туныктышыжо, йочасадын воспитательже-влак, предприятий ден организацийын, ялсоветын коллективышт шке ачаштын, кочаштын, кугезе кочаштын портретыштым кугешнымаш дене наҥгаеныт. Вет нунын патыр да лӱддымӧ улмыштлан кӧра ме тынысле кава йымалне илена. Кажне фотосӱретын – шке историйже, фронтыш ужатыме салтак, пасулаште да станок воктене пашам ыштыше лишыл шочшын пӱрымашыже. «Тиде мыйын кочам Мустафин Закирьян Талипович, – ойла мемнан коллегына Альфия Давлиева, – тудо тылыште пашам ыштен, тыршен ыштыме пашаж дене Сеҥымаш волгыдо кечым лишемдаш полшен». «А мый кугезе кочамын Янгуатов Иликбай Янгуатовичын портретшым наҥгаем, – ойла 1 №-ан Калтаса кыдалаш школын тунемшыже Зарина Зайнетдинова. – Тудо 1941 ий ноябрьыште фронтыш каен, Сталинград фронтышто, Белоруссийым утарымаште лӱддымын кучедалын, Йошкар Шӱдыр, Ачамланде сарын 2-шо степенян орденже, «За отвагу», «За боевые заслуги» медаль-влак дене палемдалтын.

10 шагатлан, митинг тӱҥалме жаплан колонно райрӱдӧ площадьыш толын шуо. Почетан трибунышто ветеран, Кугу Ачамланде сарын участникше, сарыште колышо салтак-влакын тулык ватышт, тылыште тыршыше-влак. Район администраций вуйлатыше Ю.М. Садыровын саламлымаш мутшо-влак нунылан лийыныт. Митингыш толшо еҥ-влакым районысо ветеранмыт ушем вуйлатыше Е.И. Ильчигулов саламлен. Районышто илыше самырык еҥ да самырык тукым лӱм дене 1 №-ан Калтаса кыдалаш школын тунемшыже Елизавета Сторожилова выступатлен.

Митингыш толшо-влак шӱм вургыжын ик жап сар гыч пӧртылдымӧ, сар деч вара неле сусыр деч колышо-влакым шарналтеныт. Воинский почетын ончыктен кум гана автомат залп йоҥген.

Ойгын, куанын, ӱшанын, пиалан йоча годсо жапын чияж дене музыкаль-хореографический композицийым ончыктеныт. А тудым Сеҥымаш кече лӱмеш пайрем митинглан культура пашаеҥ-влак ямдыленыт. «Священная война» аккорд дене «Эрви» куштымаш ансамбль шке выступленийжым тӱҥалын. Нунын куштымаштышт лийше трагедийым, лӱддымылыкым, чапым да шарнымашым ужаш лийын. Сарыште икшыве да ӱдырымаш-влак теме йоҥген. «Шонанпыл» йоча усталык пӧртын да «Лидер» творческий ушемын куштымаш коллектив-влакын самырык артистше-влак ояр куштымашым ончыктеныт. Кристина Русиева, Эрик Мурсакаев, Светлана Мусина, Ирина Сапиева чапле вокал номер-влакым пӧлекленыт.

Мучаште Чап мемориал воктеке пеледыш ден венок-влакым пыштеныт. Мемориалыште кажне фамилий – тиде кӧн дыр пӱрымашыже, кӧн дыр чон корштмашыже, шарнымашыже, тудо кажне тукымын шӱм-чоныштыжо ила да илаш тӱҥалеш.

С. Аркадьева.