Краснохолмский селаште Сеҥымаш кечылан лӱмдалтше пайрем мероприятий-влак эртеныт.

Ме тыныс жапыште шочынна да кушкынна. Ме нигунамат тревога нерген увертарыше сиренын йӱкшым колын огынал, фашист бобма деч шаланыше пӧрт-влакым ужына огынал, мо тыгай йӱштӧ пӧрт да сар жапысе паек – огына пале. Айдемын илышыжым кӱрлаш моткоч куштылго улмо нерген ӱшанаш неле. Окоп ден траншей-влакым ме лач кинофильмлаште ужынна да фронтовик-влакын каласкалымышт гыч гына палена. Мыланна сар – историй.

Сеҥымаш кече вашеш Краснохолмский селаште 8 майыште «Помним всех поименно» пайрем концерт эртен. Концертым ямдылымаште кугу полышым 1 №-ан КШ тунемшыже-влак, 1 №-ан йочасадын воспитанникше-влак, ДШИ ден «Нефтяник» СМФДК-н пашаеҥже-влак ончыктеныт.

9 майыште «Катюша» Всероссийский акций тӱҥалын. «Бессмертный полк» селан рӱдӧ уремлаже дене эртен. Вара сеҥымаш паркыште митинг лийын. Кугу Отечественный сарын ветеранже, тылыште тыршыше, сар жапысе йоча-влак лӱмеш шуко поро да шокшо мутым каласыме ыле.

Шочмо мландына сарыште кредалше землыкна-влакым шарнен ила. Нунын лӱмеш урем-влакым лӱмдат, нунын лӱмыштым тыгак музей, обелиск, мемориал оҥалаште муаш лиеш. Кӧ мемнан воктене кодын гын, нуно пайремым уло кумылын вашлийыт.

В. Фролов