Район вуйлатыше ветеран-влакым Сеҥымаш кече дене саламлен

Сеҥымаш кече вашеш мемнан районышто Кугу Отечественный сарын ветеранже-влакым саламлымаш поро йӱлашке пурен. Чыла ялсоветыште тиде кечын пайрем мероприятий-влак эртат, ветеран-влаклан пӧлек-влакым кучыктат.

Тачысе кечылан мемнан районышто 12 ветеран ила. Тиде – Фархетдинов Мархаметдин Фархетдинович, Логунов Дмитрий Игнатьевич, Исекеев Алексей Семенович, Зайдуллин Гарифулла Зайдуллович, Давлетшин Хазинур Валишевич, Абакшин Леонид Федорович, Арсланов Ахматнур Хаматнурович, Ахматшин Алексей Изергинович, Мисбахетдинов Мударис Гатятуллинович, Мустафин Гайнигилим Талипович, Фарафонов Алексей Данилович, Зайникаев Семен Зайникаевич.

Тиде пайрем кечылаште район вуйлатыше Юрий Садыров, район вуйлатышын социальный йодыш-влак шотышто алмаштышыже Елена Алексеева, районысо ветеранмыт ушем вуйлатыше Евгений Ильчигулов, Калтаса ден Краснохолмский ялсовет-влакын пашаеҥышт сарын ветеранже-влакым саламленыт. Юрий Минзарипович Краснохолмский селаште илыше ветеран-влакым – А. Исекеевым, Г. Зайдуллиным, Х. Давлетшиным, М. Фархетдиновым шке саламлен.

Тыгодым Юрий Минзарипович ветеран-влак дене мутланен да мыланна сеҥымашым пӧлеклымыштлан кугу таум каласен. Тыгай вашлиймаш-влак шокшо да поро шӱлышыштӧ эртеныт, ветеран-влак сар жапым шарналтеныт, вуйлатышылан пӱсӧ йодыш-влак нерген каласкаленыт. Район вуйлатыше нунын деч тазалыкышт нерген йодыштын да шуко моло йодышымат нуно онченыт.

Краснохолмский селасе ветеран-влак деч каймыж годым район вуйлатыше нунылан тазалыкым да кужу ӱмырым тыланен.

Э. Мурсакаева.