Калтаса ужара
+20 °С
Пылан
Все новости
Новости
14 Ага 2019, 12:54

Республике проектыште районын художникше ден мастерже-влак шке пашаштым ончыктеныт

Краснохолмский селаште республикыште кумдан палыме «Башкирийын йӧратыме художникше-влак» проект почеш тудын эн чолга участникше-влак выставке да концерт программе дене толыныт. Мероприятий «Нефтяник» Культура пӧртыштӧ эртен. Йоҥылыш ом лий, очыни, кӧ ты выставкыште лийын, шуко у лӱмым да концерт программе деч сай кумылым налын.
Тиде кугу арт-проектым икмыняр ий ончылно колтымо лийын. Республикыште кумдан палыме публицист, меценат Наиль Махмутов ты проектым ышташ кумылаҥден. Наиль Мазитович чыла шке шонен, организоватлен, чапле командым чумырен да проектым ыштен. Тудо «Башкирийын йӧратыме художникше-влак» моткоч сай книган авторжо улеш.
Проект ик площадкыште мемнан республикыште кисточке дене сӱретлыме, изобразительный искуствын чыла формыжын мастарже-влакым чумыраш манын ышталтын. 2020 ийлан башкир художник-влак нерген книгам лукташ палемдалтеш, а калык йӱклымаш деч вара кисточке дене сӱретлыше эн сай мастерлан республике премийым пуаш палемдалтеш. Проект икмыняр ий пашам ышташ тӱҥалеш да республикын чыла районжым авалта. Краснохолмский села пытартыш 56-шо пунктышто лийын. Нуно чевер пӱртӱс, пӱртӱсын семже деч сӱретлаш кумылаҥыт. Икмыняр автор дене палыме лийме да нунын пашаштым зритель-влаклан ончыктеныт.
Культура пӧртын фоештыже Калтаса районын кумдан палыме художникше-влакын лӱмышт дене стендым да нуным пашаштым вераҥдыме лийын. Тиде Венедикт Куршев (1918-1997), Татьяна Васина, Людмила Данилова, Наталья Улыбина, Михаил Ижболдин, Александр Шакиров, Юлия Банникова, Салават Латипов, Надежда Сатаева, Евгений Иликбаев.
Мероприятий тӱҥалтыште Наиль Махмутов район администрацийлан нуным шокшын вашлиймыштлан, а шке художникыштым поддержатлаш толшо-влаклан, искусствым йӧратыше-влаклан, залыште шинчыше-влаклан да район калыклан кугу таум каласен. «Башкир художникше-влак – тӱняште эн сай улыт, чаманен каласаш логалеш, тидын нерген чыланат огыл пале. Ме тиде проектым лӱмын, нунын дене чылаштымат палыме ышташ манын ыштенна. Тек тӱня мучко нуно палыме лийышт. Башкирий – тиде талант-влак клад. А художник-влак у сӱретым возышт манын, нунылан полшаш, кумылаҥдаш кӱлеш. Башкирийыште 1250 художник уло, но шке пашаштым ончыкташ галерей шагал. Интернет-проект нунылан шке пашаштым ончыкташ полша», – палемден Наиль Махмутов.
Художник-влаклан музыкаль полышым творческий десант ончыктен. Тушко пурат: кумдан палыме «VIA ЧАППА» рэп-группо, мурызо Евгения Сафина, ты проектын арт-директоржо, Грушинский фестивальын лауреатше, куштышо бард, автор-исполнитель Рамиль Бадамшин, диджей Артур Абдульманов. Вашлиймашым шоу-мен, «Вся Уфа» телеканалын вӱдышыжӧ Денис Ганиев намиен.
Вӱдышӧ Денис Ганиев залыште шиныше калыклан ты проект нерген кӱчыкын каласкален: «Тиде виртуальный галерей. ARTRB.RU сайтыште 1300 утла художник шке пашажым вераҥден. Ты проект тугок пашам ышта. 6,5 утла тӱжем картина, фотосӱрет, декоративно-прикладной искусствын ӱзгарже тыште уло. Проектым Россий да йот элла гыч 2000000 еҥ пурен ончен лектын». Варажым сценыш мемнан район гыч художник-влакым Татьяна Васинам, Людмила Даниловам, Наталья Улыбинам, Михаил Ижболдиным, Юлия Банниковам, Салават Латиповым, Надежда Сатаевам ӱжыныт. Нуно шкешт да шке пашашт нерген ойлышт. Тыланыше-влак художник-влакын творчествышт дене палыме лийын кертыныт, тидлан выставкым ыштыме лийын. Ме нунын пашашт дене палыме лийна. Краснохолмский искусство школын туныктышыжо-влак калыклан пейзажым, натюрмортым, портрет-влакым ончыктеныт. Наталья Улыбина 8 ий пашам ышта. Тудын пашам пырля ыштыме йолташыже Юлия Банникова – 5 ий. Кызыт декрет отпускышто улеш. Балтач район гыч Салават Латипов Краснохолмский селаште кок ий ила. Кок туныктышо Н. Улыбина ден С. Латиповлан 100 тунемше. ™дыр ден эрге-влак кумыл шуын уста мастар-влак деке уроклашке коштыт. Выставкыште тыгак «Шонанпыл» йоча усталык пӧртын шун гыч ыштыме пашашт лийын.
Э. Мурсакаева.