Сарын да пашан ветеранже-влак ушем вуйлатыше Ильчигулов Евгений Иликбаевичлан 70 ий темын

Евгений Иликбаевич 1949 ий 10 майыште Васильевка ялыште шочын.

34 ияш Е.И. Ильчигулов райком партийын кокымшо секретарьже лийын, вара – райисполкомын вуйлатышыже. А 39 ияш – районын райком партийын икымше секретарьже, вара ялозанлык да продовольствий управленийын вуйлатышыже. Тудо тыршышан, пашам йӧратышан да шкеж деч пеҥгыдын йодшан лийын. Сандене, очыни, карьера тошкалтыш дене кӱзен. Тыгак эше шинчымашыжым пойдараш тыршен.

1979 ийыште Евгений Иликбаевич производство деч кӱрылтде Башкир ялозанлык институтым тунем лектын, а 1988 ийыште – Свердловский кӱшыл партий школым. Тудо мер илышыште чолган участвоватла. Жапыште БАССР Верховный Советын, районын да ялсоветын депутатшылан сайлатын. Икманаш, калык пелен, пашазе-влак коклаште лийын. Еҥ-влак верч ойгыртен, нунылан полшаш тыршен. Сулен налме канышыш лекме деч вара Е.И. Ильчигулов сарын да пашан ветеранже-влак райушемым вуйлаташ тӱҥалын. Сай пелаш улеш, ватыж дене пырля вич чапле икшвым ончен куштеныт. «Еш, йӧратымаш да ӱшанле улмо кече» пайрем лӱмеш Ильчигуловмыт еш «За любовь и верность» медаль дене палемдалтын.

Районышто тудо чын, пашам йӧратышан лийын, калык коклаште пагалымаш дене пайдалана.

Тудлан пеҥгыде тазалыкым, кужу ӱмырым, еш пиалым да чыла сайым гына тыланена.

О. Чикирева,