Ешын кечыштыже «Победа» кинотеатрыш Еш пайремыш районышто илыше калыкым ӱжыныт

Шарнымаш дате календарьыште поро пайрем – Ешын кечыже уло. Тудо 15 маыште чыла тӱня мучко эртаралтеш. Тиде кечын «Победа» кинотеатрыш Еш пайремыш районышто илыше калыкым ӱжыныт.

Калтаса районысо «Еш» МЦ пӧлкан пашаеҥже-влак «Бумеранг доброты» порылык акцийым эртареныт да «Ава улмаш талант-влакым почеш» выставкым организоватленыт, тушто талантан ава-влакын – Ирина Бадретдинован, Фанзира Аркадьеван, Гульназ Краснован, Оксана Фахразиеван – творческий пашаштым ончыктеныт. Тиде тӱрлӧ технике дене сӱретлыме сӱрет, тӱрлымӧ паша да ленте гыч панно-влак. Самырык-влак дене пашам намийыше комитетат площадкым организоватлен, тыште волонтер-влак чыланыше-влаклан аквагрим дене оҥай да мотор образ-влакым ыштеныт.

Мемнан районышто чапле да келшен илыше ятыр еш уло. Кызытсе саманыште илыш неле гынат, нуно шке шочмо кундемыштышт тыршат да илат. Ты кастене пырля илыме юбилей пайремыштым палемдыше мужыр-влак пайремын тӱҥ унаже лийыныт. Калтаса села гыч Петр Николаевич ден Злата Сергеевна Батыровмыт пырля келшен да икте-весым пагален 60 ий илат. Ты села гычак Роза Владимировна ден евгений Иликбаевич Ильчигуловмыт шукерте огыл апрельыште шӧртньӧ сӱаныштым палемденыт. Тыгак апрельыште Кургак ял гыч Любовь Валтиевна ден Минзартин Гильмиярович Кисматовмыт 50 ий пырля илыме пайремыштым палемденыт. Кажне ешын шке историйже, илыш корныжо. Ме нине еш-юбиляр-влак нерген газетнан шушаш номерлаштыже каласкалаш тӱҥалына.

Юбиляр да ты еш пайремыш толшо-влакым район администраций вуйлатыше Ю.М. Садыров шокшын саламлен.

– Таче ме Еш кечым палемдена. Тудо обществын ик эн пеҥгыде, эн ӱшанле ужашыжлан лӱмдалтше пайрем, – каласен Юрий Минзарипович. – Тидыже моткоч куандара, мемнан Калтаса районыштат икте-весыштым йӧратен, пагален илыше еш-влак улыт. Нуно самырык еш-влаклан, чыла район калыклан сай пример улыт.

Вате-марий-юбиляр-влаклан Саламлымаш адрес ден республике вуйлатыше деч пӧлекым, а район администраций деч таум каласыман серыш ден пӧлек-влакым кучыктеныт. А культура пашаеҥ-влак чапле концерт номер-влак дене куандареныт.

С. Аркадьева.