Калтасаште «Шӱдыр дене зарядкыш» шуко еҥ ушнен

Тудым Международный классан спорт мастер, Европын Кубокшын той призержо Иван Линючев эртарен

Шуматкечын эрдене Калтаса селан рӱдӧ площадьыштыже «Шӱдыр дене зарядке» эртен, тудым бобслей дене Россий сборныйын членже, международный классан спорт мастер, Европын Кубокшын той призержо Иван Линючев эртарен.

Игече начар лийын гынат, акций школ тунемше-влакым, самырык-влак дене пашам намийыше комитетын пашаеҥже, физический культура сферыште тыршыше еҥ-влакым, икманаш, спортым йӧратыше-влакым иктыш чумырен.

И. Линючев йоча-влаклан чынжымак спорт пайремым пӧлеклен. ™дыр ден рвезе-влак ончыч профессионал разминке гыч упражнений-влакым ышташ тыршеныт, а варажым войзалтыныт да селфим ыштылыныт, автографым налыныт. Иван уло кумылын йоча-шамычын йодышыштлан вашештен.

Спортсмен Келтей ялыште шочын. Икымше гана ме тудын дене 2017 ийыште вашлийынна. Тунам тудо международный классан спорт мастерын норматившым шуктен. Жап да у сеҥымаш-влак тудым вашталтен огытыл. Иван тугаяк кодын.

– Спортышто кажне кечын тренироватлалтын да шкем кучен веле сеҥымашлашке шуаш лиеш. Зарядке мыланна кӱлеш, тыге мемнан организмна помыжалтеш. Шуена кидым, шуена йолым! Шижыда, кузе эрдыда шупшылалтеш? Ынде тыгай движенийым ыштена, пуйто асфальтым кӧргынчына, – командоватлен Иван йоча-влаклан. – Зарядкым кажне кечын ыштыман, кузе тыйын эр тӱҥалеш, туге тыйын кечет эрта. Чыладамат тазалыкдам эскереш йодам, – мутшым умбакыже шуен спортсмен.

Умбакыже спорт пайремыште йоча-влаклан тӱрлӧ таҥасымашым эртарыме. Нуно куржталыштыныт, скакалке дене тӧрштылыныт да ятыр моло таҥасымашлаште участвоватленыт – чыла тидым ыштымылан призым налыныт.

Мероприятий мучаште «Шӱдыр дене зарядке» акцийын символжым Янаул районысо спорт, туризм да самырык-влакын политике пӧлкан вуйлатышыже Салихова Альбина Ильдаровналан кучыктымо.

Э. Мурсакаева.