Келтей клубышто Марий кас пайремым эртареныт

Марий кас пайремыш ӱдырамаш-влак мотор марий тувырым чиен, кидеш кӧстенечын кучен, Келтей клубыш погынышт.

Ӱстел йыр погынен, ойласен-мутланен, тӱрлӧ оҥай лийше илыш гычын пагытым шарналтен шинчышна.

Шуко мурым мурышна – ожсымат, кызытсымат. Айтукова Венера Вениаминовна ожсо муро-влакын мутштым пала да пеш чаплын мура.

А кунам мемнан ялын уста гармончына Ибаев Борис Апсалиевич куштымо кандра семым шокташ тӱҥале, ме чыланат кушташ клуб ончыко лекна. Куштен-мурен веселан пагытым эртарышна. Мурен куштымо йӱкна Келтей мучко шарлыш, икымше май пайрем шумым шижтарыш.

Тӱрлӧ оҥай модыш-влак дене модна, викториным эртарышна.

Чылажат кумылым нӧлтышӧ ыле. Марий кас пайремна чылалан келшыш.

Клубым вуйлатыше Тимирбаева Лидия Ильинична тыгай пайремым клубышто чӱчкыдын эртара, ончыкыжат тыге погынаш каҥашышна.

Т. Данилова