Калтаса ужара
+20 °С
Пылан
Все новости
Новости
21 Ага 2019, 13:24

Кугу Агытан ялысе артист-влак шке коллективыштын 5 ияш юбилейыштым палемденыт

Ты кечылаште Кугу Агытан ял клубышто концерт эртен. Ялысе артист-влак шке коллективыштын 5 ияш юбилейыштым палемдаш лийыныт.
Ме чыланат палена, ял клубын артистше-влак – тиде тӱҥ шотышто пенсионер ден икшыве-влак. Сандене коллектив чӱчкыдын вашталтеш. Тиде, угыч ыштыме коллективлан улыжат 5 ий. Туге гынат тудо шке сеҥымашыже-влак дене моткоч кугешнен кертеш. Нунын выступленийышт ял калыклан веле огыл, тыгак унамытланат моткоч келша. Нунын мурышт, куштымашышт, почеламутым лудмашышт да спектакльым модмашышт мемнан самырык годсо жапна, рвезе годсо шӱм-чон вургыжмашна нерген куанле шарнымашым шочыктат. Тиде чын илыш да тыршен пашам ыштыме жап нерген.
Шке юбилейышт кечын артист-влак «Пестрая курица снесла золотое яичко» спектакльым модыныт. Йомакыштат, илышыштат шоҥго кова шке кочажым кечывалым коҥга ӱмбалне ик жаплан мален колтымыжлан вурса. Кеҥежым паша ятыр, чылашкыжат етшаш кӱлеш: жапым йомдарет гын, телым тидым шижат. А тудо мален колтен… Нуно нужнан иленыт, ик чыве деч посна нимо лийын огыл. Чыве коча ден ковам чаманен да шӧртньӧ муным мунчен. Нуно тиде муным араленыт, а кок ӱдырамаш толын, тиде шӧртньӧ муным онченыт, шижде тудым пудыртеныт да куржыныт. Коча ден кова ойгыраш тӱҥалыныт, а чыве нуным чаманен да мый тыланда эше шуко тӱрлӧ муным мунчем манын каласен. Тек тендам тӱрлӧ тӱсан чывигыда лиеш, нунат кугеммекышт шуко муным мунчаш тӱҥалыт да шылда лиеш. Теве тыгай пиалан мучаш. Чывын рольжым Николаева Татьяна Михайловна модын. Тиде пашам йӧратышан ӱдырамаш улеш. Ковам Ильчибаева Татьяна Матвеевна пеш сылнын модын пуэн, тудо библиотекарь лийын пашам ышта. А кочан рольжым Исинбахтин Иосиф Исаевич модын. Тудо художественный руководитель, а илышыште тудо йолагай огыл, пашам йӧрата.
Спектакль деч вара концертым ончыктеныт. Ӱдырамаш ден икшыве-влак муреныт. Кугырак артистлан – Егорова Малина Шашиевналан 78 ий. Тудын мурыжо-влак яндар памаш вӱд гай йоҥгат. Ятыр куштымаш дене куандареныт, почеламут-влакым лудыныт. «Марий кумыл» ансамбль да клуб вуйлатыше Егорова Эльза Сергеевна чылаштымат Кугече пайрем дене шокшын саламлен да марий калыкын йӱлаж ден историйже нерген ойлен. Тудо шке коллективше нерген кугешнен ойла, нуно пырля выступатлат, мемнан да пошкудо Мишкан, Краснокам, Балтач, Янаул районласе яллашке концерт дене коштыт. Нуно 70 ялыште лийыныт! Чыла вереат шокшын вашлийыт, грамота-влак дене палемдат, пӧлекым кучыктат, чай да когыльо дене сийлат. Нунын выступленийышт чылаланат келша да вес гана концерт дене толмыштым чытыдымын вучат, ӱжыт. Мыят нунын мутышт дене келшем. Мый, шочмо ялемын шочшыжо-влаклан сеҥымашым гына тыланем. Тек нуно умбакыжат калыклан куаным кондат да кушкын толшо тукымлан чапле пример лийыт.
М.Т. Кутлубаева.