Калтаса села гыч вате-марий Шаймиевмыт илыш корно дене пел курым пырля ошкылыт

Кӱлешан да ик эн чапле событийым, шӧртньӧ сӱаным палемдат Калтаса села гыч Шаймиевмыт – Васим Гатович ден Фанзиля Шаймардановна. Нуно коктынат Султанай ялыште шочын- кушкыныт, а икте-весыштым Калтаса селаште вашлийыныт. Тыште самырык еҥ-влак 1969 ий 15 январьыште ешым чумыреныт.

Шаймиевмытым икте – пашам йӧратымаш – ушен шога. Вате-марий нигунамат паша деч посна шинчен огытыл. Васим Гатовичын пашаже корно да машина-влак дене кылдалтын: армий деч вара тудо тӱрлӧ организацийлаште ятыр жап водитель лийын тыршен. Тудлан Уфа, Иркутск олалаште, Алтайыште лияш пернен. Пытартыш 17 ий Калтаса райэмлымверыште водитель лийын тыршен. Пашам тыршен ыштымыжлан тудым шуко Чап грамото да награде, тыгак I, II, III степенян «За работу без аварий» ведомственный знак дене палемдыме, пашан ветеранже улеш.

Фанзиля Шаймардановнан трудовой книжкаштыже ик возымаш гына – Калтаса селасе йочасадыш воспитательлан налме, тыште тудо кумло ий, сулен налме канышыш лекмекыже, ыштен. Икмыняр ий ме тудын дене пашам пырля ыштышна. Мемнам, самырык воспитатель-влакым, тудо шукылан туныктен: кузе занятий, пайрем-влакым эртараш, кузе ача-ава дене пашам ышташ. Пеҥгыдын йодшан, шке пашажлан вуйын шогышан, икшыве-влакым моткоч йӧратен. Йоча-влак тудын лӱмжым каласен кертын огытыл, сандене чыланат тудым Фаина Шакировна маныныт. Тудын пашажым шуко Чап грамот да награде-влак дене палемдыме. Вате-марийын чумыр паша стажышт – 78 ий.

Васим Гатович ден Фанзиля Шаймардановна Шаймиевмыт икте-весыштлан кеч-кунамат полшен шогеныт, тӱткӧ лийыныт. Нунын воктене икшыве ден уныка-влаклан кеч-кунамат шокшо да тыматле. Таче шӧртньӧ юбиляр-влакын кум икшывышт да ик уныкашт куандарат. Кок ӱдырышт, эргышт да уныкашт пеш сай айдеме лийын кушкыныт, чыланат кӱшыл шинчымашым налыныт, илышыште шке корныштым муыныт да пашам тыршен ыштат.

Тек ончыкыжымат нунын илышышт самырык-влаклан пример лийын кодеш.

С. Аркадьева.