Калтасасе гармонист-влак республикысе гармонь пайремыште диплом дене палемдалтыныт

Эртыше арнян Янаул олаште Фатыха Иксанова лӱмеш X-шо республикысе гармонь пайрем эртен. Тудо ушан-шотан еҥ-влаклан полшаш да у талант-влакым пален налаш манын ышталтын. Ий гыч ийыш эртарыме пайрем мемнан республикыште веле огыл, тыгак пошкудо регионлаштат кумдан палыме улеш.

Тений конкурсышто 300 утла еҥ участвоватлен – солист-тальянист, гармонист-влак, тальянист-влак ансамбль да калык музыкаль инструмент-влакым ямдылыше мастар-влак. Башкортостан Республикын 27 районжо ден 6 олаж гыч, Ханты-Мансийский автономный округ, Марий Эл, Татарстан, Удмурт Республикыла, Оренбург область, Пермь край гыч 70 солист да 33 ансамбль калык инструментым устан шоктен моштымо шотышто мастарлыкшым ончыктен.

Калтаса район гыч «Рвезе кумыл» гармонист-влак ансамбль, вуйлатыше Андрей Петраев, миен. Ансамбльын шым ияш гармонистше Иван Петраев фестивальын ик эн изи участникше лийын. Калтасасе гармонист-влак «За сохранений исполнительских традиций» номинацийыште диплом дене палемдалтыныт.

С. Аркадьева.