Киебак школышто башкир йылме дене диктантым возеныт

18 майыште Киебак ООШ пелен башкир йылме дене Тӱнямбал диктант эртен. Икымше гана тудо тӱнямбал статус да «Башкирла ойлем, башкирла возем» девиз почеш эртен.

Диктантым башкир йылмым аралыше да вияҥдыме Фонд, БР-се образований министерстве, М. Акмула лӱмеш БГПУ да Башкортостан Республикысе вузысо ректор-влакын ушемышт эртареныт.

Мероприятийын цельже – башкир йылмым кумдан шарымаш; общественностьым грамото шотышто пӱсӧ йодыш деке кумылаҥдаш да Башкортостан Республикыште илыше моло калыкын йылмыжым арален кодаш да ончыкыжымат тудым вияҥден шогаш.

Тӱнямбал диктантыште мемнан район гыч тӱрлӧ мер организаций гыч 107 еҥ участвоватлен: районысо образований пӧлка вуйлатыше Эльвира Рашитовна Гарипова; Роспотребнадзорын БР-се Нефтекамскысе территориаль пӧлкажын специалист-экспертше Луиза Вильдановна Ахмадуллина; Киебак школын директоржо ден завучшо; районысо башкир-влакын курултайыштын вуйлатышыже ден членже-влак; «Родник» башкир калык ушемын членже-влак; башкир йылме ден литературым туныктышо-влак; 1,2,3 №-ан Краснохолмский КШ-лан тунемшыже-влак; Киябак ден Павасола тичмаш огыл КШ-лан тунемшыже-влак.

Башкир йылме дене саламмутым районысо образований пӧлка вуйлатыше Эльвира Рашитовна Гарипова, район администраций вуйлатышын социальный йодыш-влак шотышто алмаштышыже Елена Анатольевна Алексеева ойленыт. Мероприятийым Киябак школын 3-шо классыште тунемшыже-влак башкир муро дене почыныт. Киебак школ диктантым возымо площадкыш савырнен, тыште 4 аудиторий онлайн-диктант режим дене пашам ыштен. Изижат, кугыжат уло кумылын Тӱнямбал диктантым возеныт. Акцийын эн кугу участникше Хайбуллина Файхуна Хуснулловна, Шаймухаметова Рашида Рашитовна да Исмагилова Занфира Мухарамовна лийыныт. Нуно кумытынат Краснохолмский села гыч улыт. А эн изи – Павасола КШ-ын визымше классыште тунемшыже-влак.

Онлайн-диктант деч вара чыла участникат сертификатым налын. Тиде акцийын участникше-влаклан: Киябак ООШ-ын администрацийжылан, образований пӧлкалан, Калтаса район администрацийлан, «Родник» башкир калык ушемын членже-влаклан, башкир йылме ден литературым туныктышо-влаклан да тунемше-влаклан кугу таум каласем.

Л. Давлетова.