Подписчикын кечыже Калтасаште сайын эртен

2019 ийын кокымшо пелыжлан подписке кампаний умбакыже шуйна. Кызыт Россий мучко декаде эрта, те, 26 май марте йӧратыме газет ден журналда-влаклан ӱлыш ак дене сералтын кертыда.

Шуматкечын, 18 майыште Калтаса селаште йӱлашкак пурышо Подписчикын кечыже эртен. Тиде кечын чыла тыланыше еҥ шулдырак ак дене газетлан сералт кертын. Калтаса почтальон-влак шкеныштын переносной пунктыштым шогалтышт веле, калык нунын воктене чумыргашат тӱҥале. Эн ончыч тиде шуматкечын газетлан Ф. Билалов дене Ф. Юнусова сералтыч. Нуно район газетлан подпискым ыштеныт. Тыгай вашлиймашке район газетат, почто пашаеҥ-влакат яра кид дене огыл, пӧлек дене толыт. Журнал ден газет-влакым почто пашаеҥ-влак кучыктеныт, а блокнот-влакым – «Калтаса ӱжара».

Тиде мероприятий кок шагат утла шуйныш, район газетлан 41 еҥ сералте.

Е. Акиева.