Павасолаште шочын кушшо рвезе танк биатлонын Россий кӱкшыт этапшын участникше

Калтаса селасе военкомат гыч призывник-влакым Россий армийыш колтымышт годым самырык рвезе-влаклан сай служитлаш да таза-эсен мӧҥгӧ пӧртылаш чыланат тыланат. 2017 ийыште Павасола ял гыч Изиметов Иванымат тыгаяк товатлыме мут-влак дене ужатеныт. Службым намияш тудлан келшен да сандене эртыше ийын Подмосковьен Таманский дивизийыште контракт почеш служитлаш кодаш лийын.

Таче Иван моткоч оҥай таҥасымаште – танк биатлонын Россий кӱкшыт этапыштыже участвоватла, кудыжо Волгоград олаште Прудбой полигонышто 16 майыште тӱҥалын. Тыште Кечывалвел, Рӱдӧ, Касвел да Эрвел военный округласе мотострелок-влакын эн сай взводшо ден танк-влак экипажышт таҥасат. Ты этапыш логалаш манын мемнан кундемнан шочшыжлан ойырен налме кум ступеньым эрташыже пернен. Тӱҥалтыште шке полк кӧргыштӧ эртыше таҥасымаште участвоватлен, вара дивизий этапым эртен. Ты этап гыч армийысым, вара окружной этапым сеҥен да таче – российысым.

Танк биатлон – тиде тыглай биатлон семын эрта, тольык ече да винтовко олмеш тыште технике таҥаса. 18 экипаж участвоватлен. Боевой машина-влак чыла препятствийым эртышаш да чарныде цельыш логалшаш улыт.

Иван тышке логалмылан моткоч куанен. Вет контрактым возымо деч вара улыжат пел ий гына эртен. А биатлоныш логалаш ий дене тренироватлалташ кӱлеш. Экипажыште тудо механик-водитель улеш, танкым виктара. Тылеч посна эше танкын командирже да наводчикше уло. Тиде Иванын боевой ешыже. А эн тӱҥжӧ – кажныже шке задачыжым сай палышаш да шуктышаш, тидын годым команде дене пашам ыштышаш.

Эше икмыняр ий ончыч изи ял гыч тиде самырык рвезе кугу танкым виктараш тӱҥалеш манын шоненат огытыл. Школышто сай тунемын, моло эрге-влак гаяк футбол дене модаш куржталын, техникым йӧратен. Школ деч вара Изиметов Иван Нефтекамск оласе машиностроительный колледжыште электромонтер профессийым налын. Школышто тунеммыж годымат Вооруженный Вий радамыште служитлаш тӱҥалам манын шонен. А кызыт Тӱнямбал танк биатлоныш логалаш, а тудыжо Алабиношто август тылзын эрташ тӱҥалеш, Российын чапшым аралаш тылана. Ты кечылаште мемнан кундемнан шочшыжын экипажше танкым виктарыме да туран лӱйкалыме усталыкшым пеҥгыдемда. А ме тудын таҥасыме результатше-влакым текшыраш тӱҥалына да сеҥымашым тыланена.

О. Айгильдина.