Кӧтереммыт Пошкудын кечыжым палемденыт

Чын каласыме, лишыл пошкудет мӱндыр шочшет деч сайрак. Лач тыгай сай, лишыл пошкудо-влак Кӧтерем селаште илат. Кугарнян, 24 майыште, Нефтяникмыт уремыште 22 да 24 №-ан шуко пачеран пӧртлаште илыше еҥ-влак Тӱнямбал пошкудын кечыжлан лӱмдалтше пайремым организоватленыт да эртареныт.

Поро, лишыл вашлиймаш семын эртыше пайрем, флажок да шар-влак дене сӧрастарыме, ару оралтыште лийын, калыкын пашам йӧратымыжым ме пеледыш клумбышто ужын кертынна. Ласкан мутланымаш, куанымаш, шыргыжмаш, пошкудо-влакын кидым кормыжтен саламлалтмышт тиде йӱштӧ, мардежан кечын шӱм-чоным ырыктен. Пайремым вӱдышӧ-влак Надежда Савельева да Валерий Думбадзын поро мутышт дечак чонлан ласка лийын. Нуно тиде пӧртыштӧ ятыр ий илыше-влак нерген ойленыт. Тиде Нина Константиновна Красноперова, Шумкова Валентина Тимофеевна, Исаева Патэлла, Шадрин Аркадий Николаевич, еш мужыр-влак Шитовмыт ден Дорофеевмыт, пытартышышт шке юбилейыштым палемдат. Тыгай пошкудо-юбиляр-влакым Шитов Николай Петровичым, Тимиршин Назиб Миннихановичым, Масаев Радик Юрьевичым, Савельев Иван Адреевичым, Колбин Сергей Витальевичым, Воложанина Надежда Александровнам, Гилемханова Резеда Загировнам, Дорофеева Надежда Наумовнам саламленыт. Ты оралтыште илыше-влак нерген умбакыже Савельева Лидия Григорьевна мутшым шуен. Саламлымаш деч вара «Молодушки» ансамбль шке выступленийышт дене чылаштымат куандарышт. Шке кундемын шочшыжо-влакым саламлаш Келтей ялсовет администраций вуйлатыше Б.Р. Рашитов толын.

Кидпашалан мастар в ерысе ӱдырымаш-влак Лидия Григорьевна Савельева, Галина Алексеевна Колбина, Юлия Евгеньевна Шаймарданова выставкым эртареныт. Любовь Андреевна Масаеван тӱрлымӧ картиныже-влак чылалан келшеныт. Пайрем 1 июнь деч ончыч эртен. Моткоч куанле, кунам пошкудо-влак икте-весышт коклаште келшен илат. Нуно мемнан икшывына-влаклан сай примерым ончыктат. Икшыве-влакланат модыш ден конкурс-влакым организоватлыме лийын.

Пайрем мучаште чыланат погынен, оралтыште ӱстел сийым чумыреныт, икте-весыштым, унамытым когыльо, мелна, свежа кол, салат-влак дене сийленыт. Тамле пушан чайым йӱымышт годымат нуно шке пӧртышт, оралтышт, уремышт нерген кутыреныт.

С. Аркадьева.