Краснохолмский селаште эртыше Пошкудо-влакын кечышт пайремыш моткоч шуко калык погынен ыле

Октябрьский уремысе 54, 56, 58 пӧртлаште илыше-влак пӧрт воктенсе тӱзатыме территорийыш погыненыт – тудым кодший «Городская среда» партий проект почеш тӱзатеныт, асфальтым шареныт. Калык пырля погынен кеч-могай кугу пашамат куштылгын шуктен кертеш.

Тиде мероприятийлан кугу концерт программым ямдылыме. Нуным «Нефтяник» ДК-н пашаеҥже-влак ямдыленыт (директор Надежда Дмитриевна Пята). Пеш шуко модмаш, аттракцион-влак лийыныт, нуныштым Евгения Кузнецова эртарен. Краснохолмский селаште эн изи еҥым – вич тылзаш Ксения Тимирбаевам – саламленыт. Тыгак кугу пагалымаш дене эн илалше еҥым – 88 ияш Алексей Михайлович Смирновым, «Ветеран-влак» хорын участникшым чапландареныт. Тыгак селан илышыштыже участвоватлыше чолга еҥ-влакымат монден огытыл. Тиде – Наталья Валерьевна Красноперова, Светлана Яугаровна Курбангалиева, Галина Кузьмовна Макарова, Марина Николаева Чернецкая, Римма Инсафовна Ибрагимова, Фархутдиновмыт еш. Пытартышышт келшен, икте-весым пагален 50 ий пырля иленыт.

Пайремыш погынышо калыкым «Икоян Россий» политпартийын верысе пӧлкажын секретарьже З.В. Максимова саламлен. Пайрем ӱстел поян лийын. Пошкудо-влак пырля погынен оралтыштак ӱстелым чумыреныт. Икте-весыштым тутло когыльо, тамле чай дене сийленыт.

З. Максимова.