Мемнан районнан лу эн сай тунемшыжым Российын Геройжо Александр Панфиловын грантше дене палемденыт

Шуматкечын, 8 июньышто, Калтаса селаште 2019 ийыште Сабантуй пайрем эртен.

Ий еда Сабантуй мемнам ояр, тӱрлӧ деч тӱрлӧ конкурс, концерт номер-влак дене куандара. Теният тыгак лийын. Чевер, ояр кечын кумда олыкышто погынышо калыклан сай кумылым пӧлеклен. Пайрем шӱлышыжат вара могай лийын... Шукертсек уждымо йолташ, шочшо-влак дене вашлиймаш да мутланымаш, мландыште тыршыше-влакым чапландарымаш. Сабантуй программат оҥай лийын. Тыште кажныже шкаланже келшыше иктаж-мом оҥайым ужын кертын. Имне дене таҥасымаш, кучедалмаш, спорт таҥасымаш да калык модмаш, кудывече-влак да кугу пайрем концерт.

Тений тудо поснак ойыртемалтше лийын. Тиде Сабантуй лу тунемшылан кужу жаплан шарнымашеш кодеш. Нунын тунеммаште, спортышто, творчествыште сеҥымашыштым лӱмын ыштыме грант дене палемденыт. А тудым Калтаса районышто талантан тунемше-влаклан Российын геройжо, генерал-майор Александр Вячеславович Панфилов ыштен. Грантым налаш районын 8 школжо гыч 16 йодмаш пурен лийын. Конкурс почеш лу тунемшым ойырен налме.

«За успехи в гуманитарном направлении» номинацийыште 1 №-ан Калтаса КШ-ын 10-шо классыште тунемше Ирина Быковалан икымше верым пуэныт, кокымшо верым – 2 №-ан Краснохолмский КШ гыч Екатерина Андугановалан, Кӧтерем КШ гыч 10 классыште тунемше Ольга Шуматбаева кумшо лийын.

«За успехи в техническом направлении» 2 №-ан Краснохолмский КШ гыч 10 классыште тунемше Марсель Маликовлан кокымшо вер пуалтын. «Талант» номинацийыште 2 №-ан Калтаса КШ гыч 9-ше классыште тунемше Анастасия Айгильдиналан икымше вер пуалтын. Кокымшо верым пӧленыт: 2 №-ан Калтаса КШ гыч 9-ше классыште тунемше Александра Ильчибаева, 1 №-ан Калтаса КШ гыч 6-шо классыште тунемше Элина Матвеева, Ӱлыл Качмаш КШ гыч 8-ше классыште тунемше Маркел Байдуганов. 1 №-ан Калтаса КШ гыч 7-ше классыште тунемше Леонид Колбинлан, 1 №-ан Калтаса КШ гыч 8-ше классыште тунемше Нурмухаметов Алексейлан– кумшо вер. Александр Вячеславович Панфилов тунемше-влаклан сертификат-влакым шке кучыктен.

2019 ийысе Сабантуй нерген фоторепортажым газетнан шушаш номерыштыже лудын кертыда.

С. Аркадьева.