Медицине вузлан куд выпускникше районышто медпашаеҥ-влакын радамыштым ешареныт

Мемнан районышто эмлымверыште врач-влак огыт сите. Но пытартыш жапыште ты ситуаций сай велыш вашталтеш. Эртыше ийын гына тунеммаш деч вара Калтаса селасе рӱдӧ эмлымверыш куд врач да ныл медшӱжар пашам ышташ толыныт.

Самырык-влак селам ойырен налыт да тидыже моткоч куандара. Нуно тыгак мемнан район гыч улыт, мемнан школнан выпусникше-влак. Шке шочмо-кушмо верышкышт врач лийын йыгыр ӱдыр-влак Эльмира ден Эльвира Давлетбаевмыт пӧртылыныт. Участковый врач-педиатр лийын пашам ыштат: Эльмира Фанусовна Калтаса селасе эмлымверыште тырша, а акаже – Краснохолмский селаште. Хирург-травматолог Динар Гизярович Хисамов, врач-педиатр Ляйсан Камилевна Валиева Калтасасе эмлымверыште тыршат. Моло верла гыч толшо-влакат улыт, нунылан Калтаса кундем да тудын калыкше келшат. Врач-дерматовиенеролог Ксения Валерьевна Идылбаева, Нефтеюганск гыч улеш, а врач-хирург Умеджан Гайратжанович Нурматов – Узбекистан гыч. Тудо Москва олаште Пирогов лӱмеш Россий калык шымлымаш медуниверситетшым тунем пытарен.

– Калтаса селаште мыланем илаш келша, – ойла Умеджан Гайратжанович. – Ты кундемыште, ты селаш пашам ышташ толмемлан нимынярат ом ӧкынӧ.

Ю. Шамсутдинов.