Калтаса ужара
+20 °С
Пылан
Все новости
Новости
18 Июнь 2019, 13:06

Инвалид-влак райобществын командыже республике таҥасымашлаште участвоватленыт

12 июньышто Уфа олаште инвалид-влак коклаште спорт первенстве эртен. Ты таҥасымаш, мемнан районнан чапшым аралыше спортсмен-влак нерген мыланна инвалид-влак райобществын вуйлатышыже Роберт Иванович Иванов каласкалыш.
– Инвалид-влак коклаште виш физкультурно-массовый мероприятий Российын да Олан кечыжлан лӱмдалтын лийын. Тудым Уфа оласе округын физкультра да спорт шотышто управлений ден Уфа оласе «Мир» инвалид-влак организаций эртареныт. Таҥасымаш спортын вич видше почеш эртен, оласе да районысо инвалид-влак обществын 12 командыже чумырген. Мемнан районнан командыже 8 еҥ гыч шоген. Нуно чыланат шке тӱшкаштышт сай выступатленыт да мӧҥгышкышт посна таҥасымашлаште сеҥымашлан 5 личный кубокым да чумыр командылан икымше верым пуымылан ик кугу кубокым конденыт.
Тыгеракын, 16 ияш марте ӱдыр-влак коклаште Краснохолмский села гыч спортсменке Плотникова Оля 200 метрыш куржын, а весыже – Кӧкыш ял гыч Павлова Катя тудлан ик секундым йомдарен да кокымшо куржын толын. Тыгак Оля дартс дене икымше верым налын. Эше ик самырык спортсмен, ™лыл Качмаш ял гыч Михайлов Никита 200 метрыш куржмаште уда огыл результатым ончыктен да икымше верыш лектын. Ты дистанцийыштак ӱдырамаш-влак коклаште Кӱшыл Тиктем ял гыч Батыршина Эльвирам нигӧ поктен шуын огыл, тудо ик эн ончыч куржын толын да икымше верыш лектын. Пӧръеҥ-влак коклаште Калмиямучаш ял гыч Дмитриев Руслан икымше лийын, тудо Калмаш ял гыч Байдимиров Вадим деч икмыняр секундлан ончычрак куржын толын. Вадим кокымшо верыш лектын. Эше тидым палемдаш кӱлеш, нине спортсмен-влак коклаште шукертсек тавалымаш мия. Иктыже спортын ик видыштыже сеҥа гын, весыже – тудым вес конкурсышто. Ты ганат тыгак лийын, лач кырым нӧлтымаште. 80 килограмм марте нелытан категорийыште нуно пырля логалыныт. Икымше Руслан лектын да моло спортсмен-влакым результатыштым пален тудо кырым 45 гана нӧлталын. Вара Вадим лектын да кырым нӧлташ тӱҥалын. 40 гана нӧлталме деч вара тудо чарна манын шонышна. Уке, тудо чыла вийжым иктыш чумырен, кырым 46 гана нӧлтале. Руслан тудым эн ончыч саламлыш да каласыш: «Кеч тавалена гынат, илышыште ме кугу йолташ улына».
Аркадьев Олег ден Анкудинова Любовь шашке дене таҥасеныт. Олег кокымшо лийын, а Любовь – кумшо. Призер ден сеҥыше-влак медаль, грамота да шергакан приз-влак дене палемдалтыныт.
А. Светлова.