Изи Кӧкыш ялыште – кугу пайрем

Эртыше шуматкечын Кӧкыш ялыште родо-шочшо да йолташ-влак дене вашлиймаш «Пайрем дене родем, салам Кӧкыш ялем» лӱман пайрем эртен. Ала-молан дыр чыланат Сабантуй пайремыш вашкеныт. Ала тудын сабантуй пасушто эртымыжлан. Кум шагатлан калык чумыргаш тӱҥалын. Кӱшыл Качмаш, Кокла да ™лыл Качмаш, Тиктем, Амчемучаш ял-влак, Калтаса села, икманаш, чылажымат шотленат пытараш ок лий – калык шуко лийын.

Пайремым вӱдышӧ-влак Айгильдина Эльмира Александровна ден Кугубаева Олеся Васильевна почыныт. Икымше мут ™лыл Качмаш ялсовет администраций вуйлатыше Ижбулатов Игорь Ираевичлан пуалте. Тудо погынышо калыкым да унамытым чапле пайрем дене саламлыш да нунылан пиалым, тазалыкым, сеҥымашым тыланыш.

Умбакыже райсоветын депутатше, пайремын тӱҥ спонсоржылан Габдрахманов Азат Галлямутдиновичлан мут пуалте. Тудат чылаштымат пайрем дене шокшын саламлыш, ялсоветыште ыштыме паша да ончыкылык план нерген кӱчыкын каласкалыш.

Концерт программат кугу лийын. Кӧкыш СДК-ын «Ош пеледыш» ансамбльже калыкым шке весела мурышт дене куандарышт. Тыгак йоча коллективын выступленийжылан калык совым рӱжге кырен. Икманаш, калык кажне артистым куанен вашлийын. Спорт мероприятий-влакат оҥай лийыныт. Таҥасымашлаште изижат, кугыжат участвоватленыт. Сеҥыше-влакым приз дене чапландареныт. А изи йоча-влаклан тӱрлӧ аттракцион-влакым организоватлыме лийын: батутышто тӧштылыныт, автомобиль дене коштыныт.

Пайремым тыгак Марий Эл Республике гыч артист-влак В. Комаров, С. Кстюгов, С. Пакеев да Тимиряева сӧрастареныт. Пайремыш толшо уна-влак нунын дене пырля муреныт, куштеныт, жапым веселан эртареныт.

Пайрем мучаште салютым колтеныт. Тиде мемнан депутатна деч пӧлек лийын.

Мучаште ял калык да унамыт лӱм дене пайремым организоватлышылан, Кӧкыш ялын старостажлан Тосаев Павел Сайнашевичлан шӱм гыч лекше тау мутым каласынем. Тудын тыршымыжлан кӧра пайрем чаплын эртен.

Шуко еҥ Кӧкыш ялыште пайрем районысо сабантуй деч сайрак эртен манын каласен. Мый тидын дене нигӧм обижатлымем ок шу, тыге калык ойла.

Теве «Пайрем дене родем, салам Кӧкыш ялем» пайрем мучаш лишеме. Тыгай пайремым эртарымаш поро йӱлашке пура да кажне ийын эртаралташ тӱҥалеш манын ӱшаныме шуэш. Вет лач тыште ятыр ий вашлиялтдыме родо-шочшо, йолташ-влак чумыргат, кутырат.

А. Илтимирова.