Кургым ямдылыме шотышто район семинар Савакмарий ялыште Зайникаевын кресаньык-фермер озанлыкыштыже эртен

Яллаште тургым жап – тургым ямдылымаш – тӱҥалын. Тудым сай эртарымаш деч район озанлыкын экономически вияҥмашыже шога. Сандене шӧр ден шылым ыштен налмаш да ужалымаш ялозанлык производитель-влакын тӱҥ парышышт. А нине продукцийым шукырак налаш манын, вольыкым сай пукшыман. Сандене кургым ямдылыме пашалан поснак кугу тӱткышым ойырыман.

Районысо семинар-погынымаште, а тудыжо Василий Зайникаевын кресаньык-фермер озанлыкышыже эртен, ялозанлык предприятий, КФО вуйлатыше-влак, озанлыкын агрономжо ден зооветспециалист-влак, МКЦ-ын специалист-консультантше, районысо ветеринар службын пашаеҥже-влак лийыныт. Мероприятийым почшыжла район администраций вуйлатыше Ю.М. Садыров чылаштымат «ужар тургым» тӱҥалме дене саламлен да телым вольыкым пукшымаште нимогай проблеме ынже лек манын, шукырак сенаж ден шудым ямдылаш шӱден. Юрий Минзарипович ты сомылым шукташ чыла йӧнат уло манын каласен. Тений шудо ятыр. Ындыжым тудым жапыште да сай качестве дене погаш веле кӱлеш лиеш.

Республике ялозанлык министрын вольыкым ашныме шотышто алмаштышыже Р.Р. Байтуллин кургым ямдылыме технологийым пеҥгыдын шуктен толаш шӱден.

– Ме шудым ямдылыме жапым, технологийым огына шукто, – ойла Ревнер Рафитович. – Тидлан кӧра качестван огыл кургым налына, тудыжо вольыкын организмыштыже начар шулыктаралтеш. Тышеч шӧрым шагалрак лӱштен налына, вольык нелытым начаррак пога.

Ялозанлык производитель-влаклан сенажым вынемлашке оптымо да шудым ямдылыме технологий, тудым погымо жап нерген раш докладым шанчыеҥ, ялозанлык наукын кандидатше Ф.М. Шагалиев лудын. Фанус Мустафович шке ыштыме таблицыже почеш шудын шумо жапыште тудын чоштраҥмыже, качествыжым йомдарымыжым ончыктен. Мыняр шуко тудо вожышто шога, тунаре тудым вольык начаррак шулыктара. Сандене, мутлан, козлятникым пеледышлыкым чумырымыж годым погаш йӧнан жап. Тудын мотор канде-шемалге-канде ковер гай кояш тӱҥалмыжым вучыман огыл. Ужар массе шагалрак, конешне, но тидын годым тудо сай качестван лиеш. Тыште «шагалрак, но сайрак» принцип почеш пашам ыштыман.

Пеледышлык жапыште погымо козлятник пеш чапле сенаж да шудо лиеш.

Фанус Мустафович шке выступленийыштыже сенажым оптымо технологий нерген ойлен. Тудо тыште ужар массым вынемлаште трамбоватлыме пашалан кугу вниманийым ойырен. Сенаж ынже шопо манын, тудлан сай герметичностьым ыштыман.

Семинарыште тыгак район администраций вуйлатышын алмаштышыже, ялозанлык пӧлка вуйлатыше А.К. Хамидуллин да Калтасасе ветстанцийын вуйлатышыже Р.А. Ахтариев ойленыт. Нуно шке докладыштышт семинарын темыжым умбакыже шуеныт.

Мероприятийын участникше-влак эмлык шудо гыч ямдылыме настой-влак дене кугу интерес дене палыме лийыныт. А тудыжым ветстанцийын ветврачше Зинаида Байрамгулова ямдылен. Нуным вольыкым эмлыме да профилактике шотеш кучылташ лиеш да кӱлеш. Зинаида Ильинична кажне кушкылын эмлыме пайдаже нерген ойлен. Нуж, лопшудо, вӱдлопшудо (мать и мачеха), ошвуйшудо (тысячелистник), вӱршудо (зверобой), пызлышудо (пижма) – чыла тиде мемнан дене кушкыт.

Ю. Шамсутдинов.