Кӧтерем села гыч Нефтяников уремын 19 №-ан пӧртшӧ республике конкурсышто сеҥен

Башкортостан Республикын илыме вер да коммуналь озанлык министерствын кугу залыштыже ий еда эртыше «Шуко пачеран эн сай пӧрт» конкурсышто сеҥыше-влакым чапландареныт.

Тиде проект мемнан республикыште визымше ий пашам ышта. Тушто шуко пачеран кеч-могай пӧрт участвоватлен кертеш.

Тений конкурсышто мемнан район гыч шуко пачеран ныл пӧрт участвоватлен. Тиде Калтаса села гыч Комсомольский уремысе 2 №-ан да Горький уремысе 15 №-ан, Кӧтерем селасе Нефтяников уремысе 14 да 19 №-ан пӧрт-влак.

Шуко пачеран эн сай пӧрт лӱмлан претендент-влак тыгак критерий почеш аклалтыныт: подъезд-влакым оформитлымаш да тудым арулыкышто кучымаш; конструктивный элемент, нӧреп да пӧрт кокласе пӧлемын, тошкалтыш клеткан, инженер сеть ден пӧртын фасадшын технический состоянийже; коммуналь ресурсым шотлымо прибор-влак дене пойдаралтмыже; чумыр пайдаланыме верым волгалтарымаш, тидын годым энергийым аныклыше технологий дене пайдалымаш; йоча да спорт площадкым оборудоватлымаш; пӧрт йырысе территорийым тӱзатымаш да арулыкышто кучымаш; эртыше ийын ыштыме паша да ончыкылык план нерген отчет да молат.

Кок арня жапыште комиссий конкурсыш колтымо материал-влакым кум гана текшырен, районлашке лектын коштын да иктешлен. Комиссийын составышкыже Башкортостан Республикын илыме вер-коммуналь озанлык министерствын, БР-ын илыме верым да чоҥымашым текшырыме шотышто кугыжаныш комитет, республикын муниципаль образований админстрацийын, ЖКХ сферыште чумыр текшырымашын региональ рӱдерын, ЖКХ пашаеҥ-влак профушемын вуйлатышышт-влак пуреныт.

Конкурсыш Башкортостанын 9 районжо да 8 ола гыч шуко пачеран 173 пӧрт материалым колтен. Республикын 100 эн сай пӧртым диплом да 100000 теҥге окса премий дене палемденыт. Ты окса шуко пачеран пӧрт ден мланде участкым тӱзаташ кучылталтшаш. Ты окса премий гыч 10 процентше шуко пачеран пӧрт каҥашын вуйлатышыжлан премий семын пуалтшаш.

Шӱдӧ эн сай пӧрт-влак коклашке Кӧтерем селасе Нефтяников уремын 19 №-ан пӧртшӧ пурен. Пӧрт каҥашын вуйлатышыже – Халиков Ринат Талгатович. Тудо сулен налме канымаште улеш гынат, тугаяк чолга, илышым йӧратыше еҥ улеш. Кызыт ты пӧртыштӧ илыше еҥ-влак оксам кушко кучылташ кӱлмӧ нерген каҥашат.

Конкурсышто сеҥымашке «Коммунальник» ООО-ат шке надыржым пыштен. Тушто пӧртым обслуживатлымаште, кучымаште вуйын шога.

Ушештарена, мемнан район ты конкурсышто нылымше гана участвоватла. Эртыше ийын Калтаса селасе Кооперативный уремын 1 В №-ан пӧртшӧ сеҥен (пӧрт вуйлатыше Ольна Ивановна Чикирева). Шушаш, 2020 ийыштат сеҥыше-влак лийыт манын ӱшаныме шуэш. Участвоватлыза да сеҥыза! Эн сай пӧрт-влак сеҥышаш улыт!

Л. Гильмишарипова.