Калтаса ужара
+15 °С
Пылан
Все новости
Новости
21 Июнь 2019, 14:23

Тений пырля келшен илыме юбилейым, бриллиант сӱаным Калтаса села гыч Батыровмыт еш палемденыт

Петр Николаевич ден Злата Сергеевна Батыровмыт илыш корно дене пырля 60 ий ошкылыт, пиалыштым ешыште, пашаште муыныт. Нунын ӱмырышт Калтаса район дене кылдалтын. Тыште нуно шочыныт, кушкыныт, ешым чумыреныт да пашам ыштеныт.
Петр Николаевич Ӱлыл Качмаш ял гыч улеш, а Злата Сергеевна – Калтаса гыч. «Ме, икте-весынам шукертсек паленна, – шарналтен ойла Злата Сергеевна, – Петр Николаевич футбол команде дене Калтасашке модаш чӱчкыдын толеш ыле. Мемнан селасе командым нуно эре сеҥеныт. Тидлан ме качмашмыт командылан сыренна». Кузе калык коклаште ойлат, йӧратымаш гыч ужмышудымаш марте ик ошкыл. Самырык еҥ-влак икте-весышт дене Уфа олаште палыме лийыныт. Тыште нуно тунемыныт. Злата Сергеевна библиотечный техникумышто, а Петр Николаевичым армий деч вара Уфа олаште милицейский курсым эрташ колтеныт. Ты рӱдолаште нуно келшаш тӱҥалыныт, кок ий вашлиялтыныт, икте-весылан сырышым возеныт.
1958 ий ноябрьыште нуно сӱаным модыныт. «Кугу сӱаным модын огынал, – ойла Злата Сергеевна, – но лӱмын ты кечылан мый ош проста тувырым заказатлышым. Ме ЗАГС-ыш толна, а тудо петыралтын. Тидлан верч сӱаным отменитлаш от тӱҥал вет. Тыге илаш тӱҥална». Вара 1959 28 майыште мужырнам регистрироватлышна.
Вате-марий Батыровмытын паша биографийышт, Петр Николаевичын милицийыште ыштымыже да Злата Сергеевнан районысо культура сферыште тыршымыж деч посна, туныктымо паша дене кылдалтын. Петр Николаевичын педагогический стажше 50 утла ий. Школышто тудо физкультурым туныктен, тӱҥалтыш военный подготовкым, секций-влакым намиен. Петр Николаевичылан кӧра ӱдыр ден эрге-влак спортлан шӱмаҥыныт, оружий дене палыме лийыныт, туран лӱйкалаш тунемыныт – Калтаса кыдалаш школышто чапле тир лийын. Тудын ятыр воспитанникше офицер лийын. Петр Николаевич кузе ойла, мыланем кугу награде, кунам мыйын кугем шушо рвезе-влак армий гыч служитлен толмекышт толын тау мутым каласат.
Злата Сергеевна Калтаса кыдалаш школышто кумло утла ий тыршен: тӱҥалтыште домоводством намиен, вара тӱҥалтыш класслам туныктен. Тудын тунемшыже-влак икымше туныктышыштым поро мут дене шарналтен ойлат. Злата Сергеевнан «Отличник просвещения РСФСР» лӱмжӧ уло.
Батыровмыт кум ӱдырым шочыктеныт да ончен куштеныт. Нуным чын лияш, пашам йӧраташ туныктеныт. Чыланат кӱшыл образованийым налыныт, шке ешыштым чоҥеныт. Кызыт уныкашт-влаклан куанен илат, нуным йӧратат, кугешнат. Уныка-влак кугемыныт, образованийым налыныт. Иктыже международный отношений институтым тунем пытарен, Лондонышто ила да пашам ышта. Весыже сай программист, Санкт-Петербургышто ила.
Батыровмытлан еш – ик эн тӱҥ поянлык, тидлан верч нуно иленыт да илат.
С. Аркадьева.