Елена Мазитова «Яндар йӱк – 2019» марий муро конкурсын икымше региональ этапыштыже I-ше степенян лауреат лийын

Мемнан кажнынан могай-гынат шонымашна уло. Калмаш ял гыч изи Ленанат уло – тудо мурызо лияш да шочмо марий йылмыж дене муро-влакым кугу сценылаште мураш шона. Мыйын шонымаште, тудын чыла миен лектеш. Леналан улыжат лу ий веле, туге гынат тудо ик гана веле огыл район, зона, региональ, Россий кӱкшытыштӧ эртарыме конкурслаште участвоватлен да ончыл верлам налын.

Икымше верлан черетан грамотым Лена Татарстан Республикын Менделеевск ола гыч конден. Тушто, С. Гассар лӱмеш культура Полатыште Калык-влак коклаште келшымаш Пӧртын эгидыже почеш «Яндар йӱк – 2019» икымше региональный марий муро фестиваль эртен.

Фестиваль самырык-влакым марий калыкын йӱлажым, культурыжым аралаш да пагалаш туныкташ манын эртаралтеш. Тений тудо икымше гана эртаралтын да Татарстан, Удмуртий да Башкортостан гыч мурызо ден ансамбль-влакым йырже чумырен.

Конкурсышто участвоватлашлан йодмашым 2 №-ан Калтаса КШ-ын музыкым туныктышыжо Галина Петровна Байрамова колтен. Гала-концертыште ончаш толшо калык шӱм вургыжын марий муро-влакым колыштын. Мемнан Лена марий такмак-влакым йоҥгалтарен да ончаш толшо калыкын кумылжым савырен.

Лена талантан ешыште кушкеш. Тудо изинекак клубышто эртарыме кажне концертыште выступатла. Тудын аваже, Татьяна Олеговна Калмаш ял клубышто тырша, «Девчата» мурышо ансамбльыште выступатла, йоча-влак дене кружокым намия. Кочаже, Олег Ирдуганов, гармоньым шокта, «Играй гармонь», «Ший кандыра» да моло конкурслаште чӱчкыдын участвоватла. Кугу еш тӱҥалше мурызылан чыла шотыштат полшен шога.

Лена Мазитован йӱкшылан, шкем сценыште кучен моштымыжлан кугу артистат кӧранен кертеш. Мый ӱшанем, талантан изи ӱдыр Лена ончыкыжым кугу артист лиеш. Вет шке шонымашкыже тудо пеҥгыде ошкыл дене ошкылеш.