Калмаш ялыште шога да каш пайремым эртареныт

Сабантуй чаплын эртыже манын, мероприятийын организаторжо-влаклан тыршаш пернен. Паша куштылго огыл, вет ты чапле пайремым эртараш окса огеш ойыралт. Пӧлек ден приз-влак спонсорын ойырымо оксаж дене налылтыт. А спонсор-влак – тиде ял калык. Тыгак верысе кресаньык-фермер озанлык-влакат полышым ончыктеныт. Эше тидым палемдаш кӱлеш, пайремым ялыште илыше еҥ-влак шке организоватленыт. Нигӧм вучыде чумыргеныт, каҥашеныт, ыштеныт да эртареныт.

Чумырымо окса модмаште да конкурсышто сеҥыше-влакым чапландараш ситен.

Ялыште поро йӱла аралалт кодын. Пайрем деч ончыч пӧръеҥ ден ӱдырымаш-влак гармонь да муро дене сурт еда коштыт, таҥасымашын участникше-влаклан пӧлек-влакым – шӱргӱштышым, ялукым да молымат погат да чылаштымат пайремыш ӱжыт.

Палемдыме жаплан кугу олыкышто калык чумыргаш тӱҥалын. Пайремыш Калмаш ял калык гына огыл, тыгак мемнан районнан тӱрлӧ яллаж гыч уна-влак толыныт. Игечат тиде кечын чевер лийын, кече лӱмын пайремлан шыратен ончен.

Эше тидым палемдаш кӱлеш, пайремым эртарышашлан кок кече ялын чолгаеҥже-влак олыкышто шудым соленыт да чумыреныт, артист ден зритель-влаклан сцене ден теҥгылым ямдыленыт. Модмаш ден таҥасымаш-влакым эртараш спорт инвентарьым тӱзатеныт. Кӧ тиде пайремым вучен, тудым ты ялыште эртараш шонен, шӱм-чонжо дене тудын верч ойгырен – олыкым эрыкташ толын. Вет шукыжо сай шарна, Свердлов лӱмеш озанлык лийме годым, тыште могай пайрем-влак эртеныт…

Теве музыка йоҥгалте, пайремыш толшо уна-влак чумыргаш тӱҥальыч. Кӧ-дыр йолын ошкылын, кӧ-дыр машина дене. Пайремым вӱдышӧ-влак унамытым шокшын вашлийыч. Калмаш ял калыкым да унамытым Калтаса ялсовет администрацийын пашажым виктарыше Иксанова Наталья Владимировна шокшын саламлыш.

Шокшо саламлымаш деч вара верысе артист-влак муреныт да куштеныт. Ялсовет администраций деч таум каласыман серышым ялын чолгаеҥже-влак Ирина Першина, Светлана Шуматбаева, Светлана Мурсакаева, Ольга Сайпушева, Анна Аптукаева да молат налыныт.

Кресаньык-фермер озанлык вуйлатыше-влак Федор Шуматбаев ден Елена Яшкина шке пашаеҥыштым шошо-пасу пашам мучашлыме дене саламленыт да нунылан шарнымашеш кодшо пӧлек-влакым кучыктеныт.

Сабантуй пайрем программе оҥай лийын. Тиде творческий номер-влак, вий ден писе улмым тергымаш, куреш, тыгак торгайыме радамыште тамле сий.

Калыкым шке мурышт дене Лилия Матвеева, Оксана Пакриева, Генадий Тимеряев куандараш толыныт. Тыгак верысе артист-влакым Елена ден Татьяна Мазитовмытым, Ирина Першинам, Светлана Мурсакаевам, куштымаш ансамбль гыч ӱдыр-влакым, «Девчата» ансамбльым калык шокшын вашлийын.

Тиде кечын нигӧ мӧҥгыжӧ пӧлек деч посна каен огыл манаш лиеш. Курешыште Антон Шипаев ден Артем Сайпушев сеҥеныт да кок тӱҥ призым – тага-влакым – налыныт. Пайрем мучаште ме шӱкшакым олыкышто пырля чумырген погышна. Вет чыла вере ару да порядке лийшаш.