Нунын мурышт ден куштымашыштышт калыкын шӱм-чонжо

14 июньышто Шоруньжа марий селаште калык сӱан йӱла-влак «Сӱан пайрем» («Свадебный праздник») международный фестиваль-конкурс эртен. Мероприятий «Культурная столица финно-угорского мира» проект почеш лийын. Фестивальыш Башкортостан Республике, Удмуртий, Коми, Чуваш, Нижегородский область, Пермь кундем да Марий Эл гыч 30 творческий коллектив да декоративно-прикладной творчествын 100 мастарже толын.

Калтаса районысо марий калыкын сӱан йӱлажым ты кугу пайремыште Сылвий ял гыч «Райдем-райдем» калык фольклор ансамбль (вуйлатыше Анжелика Юкчубаева) ончыктен. Фольклор коллективын участникше-влакын мотор вургемышт кажнылан келшен, журналист-влакын камерышт нунын чарныде войзгаленыт. Жюри ансамбльым «Сценическое воплощение свадебного обряда» номинацийыште диплом дене чапландарен, а мемнан гармонистна-влакын дуэтыштлан, а тудын составыштыже Дмитрий Раянов ден Сергей Яндимиров лийыныт, «Лучший свадебный гармонист» номинацийыште диплом дене палемдалтыныт.

Эрлашыжым мемнан самодеятельный артистна-влакым эше ик марий пайрем – Пеледыш пайрем (Праздник цветов) вучен. Ындыжым тудо марий кунденым рӱдолаштыже – Йошкар-Олаште – эртен. Башкортостан гыч коллектив-влакын вуйлатышыштым «Федеральная национально-культурная автономия марийцев России» общероссийский общественный организацийын вуйлатышыже Лариса Яковлева шокшын вашлие да нунылан таум каласыман серышым, пӧлек-влакым кучыктыш. Пайремыш толшо калык да уна-влак мемнан ансамбльын ветеранже Мария Измайлован акрет годсо марий мурым тунаре сылнын йоҥгалтарымыжлан моткоч ӧрыныт.

А тылеч ик кече ончыч Йошкар-Олаште «Какшан сер ӱмбалне» марий авторский муро фестиваль эртен. Тыште мемнан район гыч Ирина ден Адик Ибакаевмыт, Алевтина Баязитова чолган участвоватленыт. А. Баязитова вате-марий Ибакаевмыт дене пырля «Эрвел чинче» мурым йоҥгалтареныт да III-шо верым налыныт. А Пеледыш пайремыште Адик Ибакаев «Эн тале гармончо» номинацийыште III-шо верлан диплом дене палемдалтын.

И. Тимиряева.