Самырык тукым таза илыш-койышым ойырен налын

Павасола ялыште тыгай лӱман спорт пайрем эртен

Эртыше кугарнян Павасола ял спортым йӧратыше да чолга, таза илыш-койышым намийыше-влакын площадкышкышт савырнен.

Спорт мероприятийыште Нефтекамск ола гыч «Атлеты-Моржи» да «Трезвая Дружина» толкынын чолгаеҥже-влак Рычапов Вячеслав ден Миндияров Савелий участвоватленыт. Эше тидым палемдаш кӱлеш, Савелий мемнан землякна, У Оръямучаш ялыште шочын, эше пауэрлифтинг да стритлифтинг дене спорт мастерыш кандидат улеш.

Самырык еҥ-влак аракан, тамакам шупшмашын да наркотикын тазалыклан могай кугу эҥгекым конден кертмыже нерген лекцийым лудын, тыгак ты теме почеш мультфильмым да «Атлеты-моржи» чолгаеҥ-влакын пашашт нерген роликым ончыктеныт. Тылеч посна ӱдыр ден эрге-влак толкынын чолгаеҥже-влакын пашаштым шке ужын кертыныт. Вячеслав ден Савелий нунылан перекладиныште мастер-классым ончыктеныт. «Солнышкым» ончаш гына мо лийын… Савелий турникыште тыртын, а калык нуным ончен ох да ах манын кычкырленыт. Моткоч оҥай лийын. Пайремын унаже-влаклан нуно моткоч келшеныт. Нунын почеш рвезе-влак шупшылалтыныт,

перекладиныште тӱрлӧ упражнений-влакым ончыктеныт. Нунын кокла гыч Ахмадиев Александр (9 класс) да Исаев Ринатым (5 класс) палемдаш кӱлеш. Ончыкыжым нуно спортсмен лийыт манын ӱшаныме шуэш.

Мероприятийыште верысе депутат Павел Тимурович Петров лектын ойлен. Тудын деч икшыве-влак спорт площадкым чоҥаш йодыныт. А вет ялыште тудым чоҥат гын, могай сай лиеш ыле. Самырык-влак ятыр улыт, чапле да вияш чонан, тидын годым вашке ӱшанышан икшыве-влак илат. Лач тыгай йоча-влак аракам йӱмӧ да тамакам шупшо корныш вашке логал кертыт. Сандене кугыеҥ-влаклан тидын нерген кызытак шоналтыман, а нуным уда койышаныш савырнымекышт вурсыман огыл.

Мероприятий мучаште тӱрлӧ конкурс, модмаш-влак эртышт. Флэшмобым веселан да чолган куштеныт. Эше тидын нерген каласыман, мероприятийым Павасола ял гыч лекше-влак Ибрашева (Шаймарданова) Светлана ден Сафаргалиева (Байрашева) Наталья эртараш лийыныт. Шкеже Нефтекамск олаште илат, но ял илыш верч тургыжланат. Поснак Светлана тӱрлӧ мероприятийым эртараш тарата. Тудо шке кундемжын калыкшылан волейбол сеткым пӧлеклен. Касвелеш ял калык Октябрьский да Трудовая урем-влак кокласе переулкышто чумыргеныт, тыште ялын чолгаеҥже-влак пайрем деч ончыч ик-кок кечыште футбол, баскетбол, волейбол пасулам ямдыленыт. Тиде Гараевмыт, Николаевмыт, Аймурзинмыт, Баязитовмыт, Васильевмыт, Мусаляевмыт, Шуматбаевмыт да молат. Тыште музыка йоҥген, команде дене конкурс, модмаш-влак эртеныт, эсогыл аниматорат лийын. А пайремын эн изи унаже-влаклан сӱретлаш, батутышто тӧрштылаш йӧн лийын. Кугыеҥ-влак волейбол дене модыныт. Кызытат шарналтеш, 80-ше ийлаште ты верыштак кажне кечын касвелеш, самырык-влак чумыргеныт да пычкемшалтмешке модыныт. Кызытсе самырык еҥ-влакат тыгак чумырген модаш тӱҥалыт манын ӱшаныме шуэш. Вет тидым арамлан огыл ыштыме.

Мыйын йодышем лекте: пайремым организоватлаш кушеч оксам муыныт? Тиде Ибрашева Светлана пайремым эртараш идейым пуэн, а калык тудым поддержатлен. Кӱчык жапыште ял калык оксам чумырен. Кӧ 200 теҥгем, кӧ 100-ым, а кӧ дыр 500 теҥге дене пуэн. Икманаш, пырля икте-весыштлан пайремым пӧлекленыт. Икшыве-влак модмаш деч сай кумылым, приз ден сийым, чолгаеҥ-влак таум каласыман серышым налыныт. А мероприятийын организаторжо-влак шке пашашт деч куаным налыныт.

Кузе Вячеслав Рычапов каласен: «шӱм-чонышто тул уло да те илышым умыледа гын, тидын дене йыр илыше еҥ-влак дене пайлалтман». Кугыеҥ, поснак тӧра-влакын шӱм-чоныштышт тиде тул ылыжеш манын поснак ӱшаныме шуэш. Мемнан депутатнат ялыште рвезе-влаклан спорт площадкым чоҥаш полша. А тиде чапле мероприятий таза илыш-койышым намияш тӱҥалмылан икымше ошкылым ышта. Кӧ-дыр тидын нерген шоналта да аракам йӱмыжым, тамакам шупшмыжым кудалта, спорт дене кылым кучаш тӱҥалеш да сеҥымашлашке шуэш. А ме нунын верч куанаш тӱҥалына.