Школ-влак тунемше-влакым вашлияш ямде улыт мо?

Тиде йодышлан вашмутым лӱмын ыштыме межведомственный комиссий пуа.

Кеҥеж але эше тӱҥалын гына, йоча-шамыч кужаш вучымо каникулыш лектыныт, туге гынат, школ ден йочасадлаште у тунемме ийым чыла шотыштат кузерак сайын вашлияш манын шонат. Район администрацийын пунчалже почеш, у тунемме ийлан тунемме учрежденийым эн сай ямдылыме шотышто смотр-конкурс увертаралтын. Моло ийласе семынак тудо школ, йочасад, да ешартыш шинчымашым пуышо моло учреждений-влак коклаште группа да номинаций-влак почеш эрташ тӱҥалеш.

Тунемме учрежденийлан йоча-влакым вашлияш ямде улмыштым лӱмын ыштыме межведомственный комиссий тергаш тӱҥалеш. Тудын составышкыже образований пӧлкан, кугыжаныш пожар надзорын, элкӧргӧ паша органын Росгвардийын специалистше-влак пуреныт. Комиссий шке пашажым 9 август марте мучашке лишемдышаш улеш. Иктешлымашым моло ийласе семынак районышто августышто эртыше педагогический конференцийыште ыштат.