21 июньышто Россий МВД-н кинологический подразделенийым ыштымылан 110 ий темын

Таче ме тыланда инспектор-кинолог, полицийын старший лейтенантше Андрей Сатаев нерген каласкалена.

Андрей 1982 ийыште Кӧкыш ялыште шуко икшыван ешыште шочын.

Андрей изинекак пашалан тунемын. Суртышто да оралтыште сомыл ятыр лийын. Шым еҥ гыч шогышо ешыште ушкалым, шорыкым, сӧснам да сурткайыкым онченыт.

1№-ан Калтаса кыдалаш школым тунем лекмеке, тудым Россий армийын Вооруженный Вийышке срочный службым эрташ налыныт. Тудо Китай дене чекыште Читинский областьыште пограничный войскаште служитлен. Армий деч вара чоҥымо организацийыште пашам ышташ тӱҥалын. 2003 ий октябрьыште элкӧргӧ паша органын службышкыжо пураш лийын.

Андрей Калтаса районысо элкӧргӧ паша пӧлкан патрульно-постовой службын милиционерже лийын пашам ышташ тӱҥалын. Служитлыме жапыште Уфа оласе предпринимательстве да права техникумын «Правоведение» специальность почеш заочный пӧлкаште тунемын.

2013 ий мартыште Россий МВД-ын Калтаса районысо пӧлкажын инспектор-кинолог лийын тыршаш тӱҥалын.

Пашам сай шуктымыжлан, оперативно-служебный пашаште уда огыл результат-влакым ончыктымыжлан ик гана веле огыл кумылаҥдаралтын.

2015 ийыште кеҥежым Андрей полицийын передвижной группыж дене пырля правам пудыртымаш да осал пашам ыштымаш профилактика шотышто Калтаса район территорийым патрулироватлен. Тылеч ончыч, 14-15 июньышто йӱдым Амчемучаш ферме гыч 10 презым шолыштыныт лийын. Андрей службым намийымыж годым «Газель» бортан автомашинам ужын. Тудо ты автомашинам чараш лийын, туге гынат водитель чарнен огыл да умбакыже корно дене кудалын, эше скоростьшым кугемден. Автомашина фургонын шеҥгел виш омсаштыже презе-влак койыныт. Полиций пашаеҥ-влак тиде «Газельым» покташ тӱҥалыныт. Икмыняр гана предупредитлыме деч вара полиций пашаеҥ-влак оружийым кидышкышт налыныт. Андрей Сатаев шке автоматше гыч автомашинан колесашкыже лӱен, осал пашам ыштыше еҥ-влакым кученыт. А «Газель» машинан кузовыштыжо ферме гыч шолыштмо 12 презе лийын. Шке служебный пашажым сай шуктымыжлан, сак лиймыжлан, профессионал действийжым устан да моштен кучылтмыжлан Андрей Сатаев БР МВД-ын Чап грамотыжо дене палемдалтын.

Башкортостан Республике элкӧргӧ паша органын да подразделенийын пашаеҥже-влакын художественный самодеятельный творчестве фестивальыште чолган участвоватла. Службо деч яра жапыште кушташ коштеш да «Эрви» калык куштымаш ансамбльын участникше улеш.

Пӧлкаште Виш омсам почмо кечым эртарыме годым Калтаса районысо тунемше-влак дене вашлиймашым организоватла. Андрей тунемше-влакым шке пашаже дене палыме ышта, служебный пий-влакын пашаштым ончыкта. А нуныштым икшыве-влак ӧрын, кугу интерес дене ончат.

2018 ийыште оперативно-служебный пашам иктешлымеке Андрей Сатаевым Пӧлкан эн сай пашаеҥжылан шотленыт да куснылшо кубокым кучыктеныт.

Андрейын пелашыже уло, кок икшывым ончен куштат.

Таче ме Андрей Миксоновичым профессиональ пайремже – Россий МВД-ын кинологический подразделенийым ыштымылан 110 ий темме дене шокшын саламлена! Тиде куштылго огыл пашаште тудлан сеҥымашым, поро да почетан службым, илыш оптимизмым, пиалым да тазалыкым тыланена. Паша кечыже куанле да пиалан лийже. А пӧртыштыжӧ тудым йӧратыме ешыже, илышыште ӱшанле йолташ-влак вучышт.

С. Саляхова