Кечывалым каныме «Солнышко» лагерьыште 146 икшыве каналтен

Шеҥгелне эше ик тунемме ий кодо, а ончылно каникул, веселан эртарыме жап, куанымаш, модмаш.

1 №-ан Калтаса кыдалаш школышто 1 июнь гыч кум смене пашам ышташ тӱҥалын: 8, 10 класслаште тунемше-влаклан «Трудовой», кокла звенолан «Профильный», тӱҥалтыш класслаште тунемше-влаклан «Солнышко».

Тений кечывалым каныме «Солнышко» лагерьыште 146 икшыве каналтен. Икшыве-влакым 7 отрядлан пайленыт: «Смайлики», «Crazy Dance», «Звезды галактики», «Coca Cola», «Клевые девчонки», «Спортсмены» да «Лучики».

Кажне отрядыште, заказ семын, чолга, энергичный ӱдыр ден рвезе-влак чумыргеныт. Нунын дене пашам ышташ поснак кумылло лийын. Каналтымаш, шуаралтмаш, спорт дене кылым кучымаш – тидыже лагерьыште кажне кечын лийын. Кок гана шокшо кочыш дене пукшаш повар-влакын вачӱмбакышт возын. Нуно шке пашаштышт мастар улыт. Повар-влак кажне кечын тамле да пайдале кочкыш, фрукто, свежа пакчасаска гыч салат-влак дене куандареныт. Лагерьын воспитательже-влак – тиде мемнан школнан туныктышыжо-влак Сапиева Ирина Дмитриевна, Акиева Светлана Сергеевна, Чужекова Марина Адреяновна, Круговых Татьяна Владимировна, Чиглинцева Елена Владимировна, Шамкаева Лилия Евгеньевна, Магсумова Финиса Фавиевна, Яндемирова Ольга Ивановна, Нигаманова Алсу Аликовна, Кагирова Юлия Владимировна, Байдуганов Радик Викторович, Насибуллина Ольга Владимировна, Шуматиева Надежда Биктимировна, Исликаева Юлия Сапиевна, а лагерьым Ишкуатова Людмила Никитична вуйлатен. Воспитатель-влак дене пырля мемнан лагерьыште икшыве-влакым йӧратыше вожатый-влак пашам ыштеныт, тиде тӱҥ шотышто 6-7 класслаште тунемше-влак.

Кажне кечын лагерьыште поро шонымашан шӱлыш шижылтын. Икшыве-влаклан поян да оҥай программым ыштыме лийын: яндар южышто модмаш, спорт таҥасымаш, тазалык минутко, сӱрет-влак конкурс, библиотекыш коштын толмаш, викторине да йомак-влакым модын ончыктымаш. Отрядлаште «Оригами» «Умники и умницы», «Шашки и шахматы», «Я художник» кружок-влак пашам ыштеныт. Тыште ӱдыр ден эрге-влак шке талантыштым почын кертыныт. Тыгак шуко тӱрлӧ тематический кече-влак эртеныт. Пушкинын кечыже театрализованный представлений, лудшо-влак да викторине конкурс дене шарнымашеш кодын. Российын кечыжын икшыве-влак шке шочмо-кундемыштым сӱретленыт. Тазалык да спорт кечын йоча Сабантуй да «Весела старт-влак» эртеныт.

Кечывалым каныме «Солнышко» лагерь икшыве-влаклан сай кумылым да шарнымашым коден манын ӱшаныме шуэш.

Л. Ишкуатова.