Тошто Яш ялсоветыште Ю.М. Садыров граждан-влак дене вашлийын мутланен

Ты гана район администраций вуйлатыше Юрий Минзарипович Садыров калык дене мутланыме форматым вашталташ лийын.

Тудо ял калык дене кабинетыште огыл, а уремыште але моло верыште, кушто кутыраш, нуным тургыжландарыше проблеме-влакым каҥашаш лиеш, эртарен. Ялыште социально-культурный кӱлешлыкан учреждений пашам ыштымыжым шке шинча дене ужман, вара ялсовет вуйлатыше да калык дене тудын пашажым саемден колташ манын, могай пашам шукташ кӱлмӧ нерген шоналтыман.

Ялыште инфраструктурым саемдымаште кугу рольым конешне корно модеш, рашрак каласаш гын, тудын могай состоянийыште улмыжо. Тошто Яшыште, тыгак Актыганыште чыла уремлаш асфальтым шарыме. Ты амал дене тоштояшмыт деке унала эсогыл президент М.Г. Рахимов толын каен. Нунын дене пырля уремыште кандырам пунен куштен. Тунам асфальтат тӧр лийын да президент нигушто шӱртнен огыл. Ындыжым корно полотно верын-верын локтылалтын. Тыште шӱртняш веле огыл, йолымат тугаш лиеш.

– Корным олмыктымо шотышто локальный сметым ямдылаш кӱлеш, – каласен Юрий Минзарипович ялсовет вуйлатышылан, – ты сомыллан оксам муаш тыршена. Яра шогышо пӧрт-влак шотыштат пашам пуымо. Молан вара нунышт мотор ялын тӱсшым пужен шогат.

Тыгак культура учреждений, медицине обслуживаний, пожар ваштареш кучедалме шотышто пашам вияҥден колтымаш да правам пудыртымо шотышто профилактике нерген мутланымаш миен.

– Чыла тиде ялсовет вуйлатышын пашаж деч шога, – палемден Юрий Минзарипович, – тудо калык дене мутланен, нунын дене пырля каҥашен пашам ыштышаш.

Эше тидым палемдаш кӱлеш, шукерте огыл ялсовет депутат-влак шке погынымаштышт у вуйлатышым – Виталий Апсаликовым палемденыт. Тудо пеҥгыдын йодшан, мутланаш йӧратышан еҥ улеш. Ятыр поро пашам шуктен. Тудын вуйлатымыж почеш да ялын чолгаеҥже Павел Артамоновын полшымыж дене Братовщина ялыште пӱям тӱзатеныт, ты сомылым шукташ Совет Ушемын Геройжо Дмитрий Лазаревын тукым шольыжо спонсор лийын. Тошто Яш ялыштат эҥерым пӱялыме.

У Яш ялыште кок у пӱя уло.

– Ындыжым черетыште Актыган ял шога, – каласен Виталий Апсаликов.

Кӱчык жапыште у вуйлатыше несанкционированный свалке-влакымат пытарен. Ындыжым тудын ик эн тӱҥ задачыже – несанкционированный карьерым пытараш.

– Ала-кунам дыр тудын ресурсшо дене чыланат пайдаланеныт: нефтяникмыт, корно пашаеҥ-влак да молат. А тудым нигӧн тӱзатымыже ок шу, – ойла тудо. А ялсовет ты пашам шкет шуктен ок керт.

– Тендам велым инициативе лиеш гын, ме кеч-кунамат полшаш ямде улына, – каласен Юрий Минзарипович Тошто Яш калык дене чеверласымыж годым.