Самырык-влак кӧ лийын пашам ыштынешт?

Порталын данныже почеш, Башкирийыште талук тўҥалтыш гыч 18 гыч 35 ий марте граждан-влак ужалымаште, производствыште, административный персонал сферыште, сырьем лукмаште пашам кычалыныт.

Кӧ карьерым ышташ тўҥалын, кугу конкуренций шижылтын. Мутлан, ик вакансийлан 12,3 резюме логалеш. Тиде тўҥалше специалистлан пашам кычалмаште ик эн тўҥ амал.

«26-35 ийласе специалист-влак коклаште паша рынкыште вес ситуаций. Нунын паша опытышт уло, тугеже пашаверым кычалмашлан кугу тўткышым ойырат. Самырык специалист-влаклан, сай пашадар да карьере деч посна, тунеммашым эрташ йӧн лийшаш, оҥай задаче да проект, тыгак коллективыште сай паша кумыл лийшаш, – комментироватлен HeadHunter пресс-службын вуйлатышыже Анна Осипова.

Текшырымаш гыч пален налме, Башкирий гыч самырык-влак вес вере илаш каяш шонат. Нунын кокла гыч 31 процентше гына тыште пашам ышташ кодаш кӧна.

Самырык-влак Москваш, Санкт-Петербург, Казаньыш илаш куснынешт. Эл-влак коклаште Казахстан, Белоруссий, США, Германий, Канада, Грузий, Украина да Великобританий.

А. Зайнетдинова.