Пиалан рвезе годсо жап

Ожнысек, Самырык-влакын кечыштлан лўмдалтше район мероприятий-влак Краснохолмский селаште эртат. Тиде шукертак поро йўлашке пурен. Вет Краснохолмский села мемнан районышто ик эн кугу. Тыште самырык-влакат шуко улыт да эше тыште самырык еҥ-влакат чулымрак улыт, очыни. Ончыч ты селаште мотогонкым эртареныт, тудым ончаш моткоч шуко калык погынен. Шке футбол да хоккей командыже лийын. Нуно республике чемпионатлыште участвоватленыт. Эртыше курымын 80-ше ий мучаш 90-ше ий тўҥалтыште верысе самырык еҥ-влак самырык-влакын жилищный кооперативлашке ушнен, шкаланышт шуко пачеран пӧрт-влакым чоҥеныт.

Селаште илыше кызытсе самырык еҥ-влакат социально-общественный ончымаште чолга улыт. Тольык нунын шонымашыт вес тўрлӧ. Жап вашталтеш, калыкат вашталтеш.

Шке чолгалыкыштым Краснохолмский селасе самырык еҥ-влак эртыше Самырык-влакын кечыштлан лўмдалтше пайремыштат ончыктен сеҥеныт. Тудыжо кодшо шуматкечын эртен. Тудо кок этап дене эртен. Кечывалым модмаште, конкурслаште, аттракционлаште йоча-шамыч веселитленыт гын, кастене «Нефтяник» ДК-те эртыше концертыште самырык еҥ-влак.

Палемдыме ныл шагатлан Культура пӧрт шеҥгелсе теҥгылыште да тудын воктенысе спорт площадкыште калык шуко погынен ыле. Пайремыш ача-ава-влак шке икшывышт дене, йоча-шамыч да самырык еҥ-влак толыныт. Самырык-влакын мероприятийышкышт тыгак ветеран-влакат толыныт ыле. Коча ден кова-влак модмаш ден конкурслаште участвоватлен огытыл гынат, йоча-шамычын таҥасымашыштым да модмыштым куанен онченыт. Кеҥежымсе эстраде площадке ончылно культура пӧлкан методистше-влак Евгения Кузнецова ден Валерий Думбадзе йоча-шамыч дене тўрлӧ весела модмашым, куштымаш марафоным эртареныт. Поснак моткоч оҥайын да веселан «Холи» модмаш эртен. Тудо мемнан деке Индий гыч толын. Йоча-шамыч икте-весышт деке пудра семын кукшо чиям кышкеныт, тиддеч вара площадке тўрлӧ тўсан мозаике гай лийын шинчын.

Спортплощадкыште тидын годым «Центр» клубын да «Семья» МЦ-ын пашаеҥже-влак икшыве-влак дене тўрлӧ модмашым эртареныт. Тыштак моткоч оҥай да весела лийын.

Кугырак ийготан йоча-влаклан «Лидер» ДЮСШ-ан тренерже-влак спорт таҥасымаш-влакым эртареныт. Рвезе-влак футбол топым чуменыт. Тыште эн сай результатым Смородинов Никита ончыктен. Кокымшо ден кумшо верлам Ян Нурисламов ден Максим Хабиров налыныт. ўдыр-влак 200 метрыш куржыныт. Тыште 3 №-ан Краснохолмский КШ гыч Валиева Гузель сеҥен. Кокымшо 1 №-ан Краснохолмский КШ гыч Сабирзянова Сулейма лийын, кумшо – 3 №-ан Краснохолмский КШ гыч Нурисламова Гузель. Пайремыште тыгак «Лидер» ДЮСШ-ан первенствыжлан модшо да сеҥыше оралтысе футбол команде-влакым награждатленыт. Куснылшо кубокым Смородинов Никитан вуйлатыме команде сеҥен налын, «шийым» – Сартдинов

Русланын командыже, кумшо – Шакиров Кириллын командыже.

Пайрем участник-влак тыгак кумылын 3 №-ан Краснохолмский КШ-ын самырык спасатель-влакын выступленийыштым онченыт. Тыште «Школа безопасности» пашам ышта.

Самырык спасатель-влак пожарым йӧртымӧ годым мом ышташ кўлмым ончыктеныт. Тиде выступлений годым нунын воктенышт 102 №-ан ПЧ-ын пашаеҥже-влак лийыныт.

Изирак йоча-шамычлан пайрем площадкыште шуко аттракцион пашам ыштен. Кугыеҥ-влаклан селасе предприниматель-влак шашлык да моло кочкышым ямдыленыт. Икманаш, пайремыште чылажат лийын. Ик жаплан йўржат йўрмым чарнен ыле. А теве кастене пайрем концерт ден дискотекым «Нефтяник» ДК-те эртараш вереште. Йўр тўҥалын.

Пайрем касыште самырык еҥ-влакым район администраций вуйлатыше Ю.М. Садыров саламлыш. Юрий Минзарипович самырык еҥ-влакын район вияҥмашке кугу надырым пыштымыштым палемден да чыла сайым гына нунылан тыланен. Район администраций вуйлатыше районысо самырык еҥ-влакын толкыныштын чолгаеҥышт-влаклан Чап грамотым кучыктен. Коло ныл еҥым чапландареныт. Самырык-влакын политике министерствын Чап грамотыж дене Кӧтерем СДК-ан методистше Валерий Думбадзем, 2 №-ан Калтаса КШ-ын выпускницыже, ынде Уфасе медколледжын студенткыже Ольга Валтиевам, ОГИБДД-ын инспекторжо Татьяна Нурисламовам палемденыт. Министерствын Чап грамотыж дене тыгак 2 №-ан Калтаса КШ-ын директоржо Ришат Бигаевым да «Нефтяник» ДК-ын художественный вуйлатышыже Евгения Кузнецовам. Нуным самырык-влакын толкыныштышт чулымын участвоватлымыштлан, самырык еҥ-влак коклаште кугу пашам намийымыштлан кӧра палемденыт.

Пайрем концертыште «Нефятник» ДК-ан самодеятельный коллектив ден мурызо-влак выступатленыт. Залыште шинчыше калык нунылан совым рўж кырен.

Калыклан поснак «Своими руками» мурышо-инструменталь группылан выступленийже келшен.

Пайремын организаторжо-влак Россий МВД-ын Калтаса районысо пӧлкажын пашаеҥже-влаклан, предприниматель Юлия Гайнанова да самырык волонтер-влаклан пайремым эртараш полшымыштлан кугу таум каласат.

Ю. Шамсутдинов.