Вес элыш кайынет – прививкым ыште!

Кеҥеж каныш годым турист-влак инфекций шотышто лӱдыкшӧ улман эллашке каяш тарванат. Эн чот малярий, холера, лихорадке чер деч шекланыман.

Тыгак Российыште вашлиялтдыме экзотический манме пижедылше черым мемнан элыш конден кертыт. Мемнан-влак чӱчкыдын Индийыш, Вьетнамыш, Африкыш канаш каят. Нине эллаште эше эбола лихорадке манме чер шарлен.

Кажне турист личный гигиене правилым шуктышаш.

Шолтыдымо вӱдым йӱман огыл. Фруктым, саскам чот мушман.

Тыгай эллашке кайыше-влаклан иммунизацийым ончылгоч эртарыман. Мутлан, Саудовский Аравий элыш кайыме деч лу кече ончыч менингококковый инфекций ваштареш прививкым ыштыман. Кечывал Америкыш да Африкыш кайыше-влаклан – желтый лихорадке (амариллез) ваштареш. Турист корныш лекме деч ончыч прививкым ышташ ида мондо.

А. Илтимирова.