Пиал корно

5-ше июльышто мемнан «Марий кумыл» фольклор ансамбльна кужу корныш тарваныш. Тыге, тӱшкан погынен, ме шуко районышто лийынна: Мишкан, Балтач, Янаул, Краснокам, Илиш, Благовещенск, а теве мемнан вуйлатышына-влакын поро кумыл дене «Газель» машина дене ужатен колтымышт кумылым каваш нӧлтен. Шаран районышто тиде кечын район кокласе «Ший кандыра» фестиваль пайремлалтын.

Икымше гана, Шаран велысе пӱртӱсым ончен куанен, ме «Пиал корно» капка ончык толын шогална. Мемнам мотор тувыран марий ӱдырамаш, алал кумыл дене вашлийын, кидешна мотор тасмам кылден, тиде корно дене ошкылаш темлыш. (Эн ончычшо мый, чыла ужмылан куаныме чонем дене чылажымат умыленат шым шукто, а вара, шымленрак ончалмек, уэш тӱҥалтыш гыч мучаш марте ошкыльым: ала илыш мучаш марте пиал корно дене гына кошташ пӱра).

Кован сондыкшо гыч лукмо тошто вургемым чиен шогалмек, мемнан йыр шуко еҥ погыныш: кӧ дыр йыдалым ужын, войзгала, кӧ дыр воктек толын шогал войзалтеш. БСТ телевидений гыч толшо-влакат йодыштыт, войзгалат. Вара умылышым, Шаран районысо, пырля тунемме, йолташем-влак «музейыштат шуэн вашлийына» ойлышт.

Пайрем пеш веселан эртыш. Мемнан коллективнат марий койыш да вургемым арален шогымылан диплом дене палемдалте. Марий калыкын поро йӱлажым шымлыше калык уна-влакым пукшыш-йӱктыш. Кастене пеш шуко калык РДК залыш погыныш: уло кумылын мемнан коллектив концерт программыжым ончыктыш. Тынар шуко поро тыланымаш, поро шомак дене Шаран вел марий калык мемнан кумылнам нӧлтыш.

Эрлашыжым, 6 июльышто, Акпарс ялысе пайремыш ӱжыч. Мемнам шерге уна семын вашлийыч. Совхоз уремысе кажне кудыш пуртен ончыктышт: мыняр уста кидан, талантан айдеме ила улмаш. Ял калык калтаса вел семна дене куштышт, мурышт.

Чыла чон куаным ончыкташ мутат ок сите. Шаран велыштат пырля тунемме йолташ-влак дене вашлиймашым, нунын уна вашлийын моштымыштым нимогай веса денат висаш огеш лий.

Пиал корно. Тидым кажне еҥ шке семынже умыла. Кажнын шке пиал корныжо. Тудо йыжыҥан маныт. Тиде кок куан кече мемнан «Марий кумыл» ансамбльын участникышт-влакын илышыштышт ик кужу йыжын пиал корно семын шарналт кодеш.

Э. Егорова.