Еш – йӧратымаш, ўшанле улмо тўня

Россий Еш, йӧратымаш да ўшанле улмо кечым лу ий утла палемда. Тудо шнуй-влак Петр ден Февронийым шарныме лўмеш ышталтын. Нуно шке йӧратымашыштым ятыр чытымаш гоч арален кертыныт да икте-весыштлан ўшанле лийын кодыныт. Пайрем лўмеш общественный наградым – «За любовь и верность» медальым пеҥгыдемденыт. 25 ий утла келшен илыше еш-влак ты награде дене чапландаралтыт. Тений ты чап награде дене Иликбаевмыт еш палемдалтын. Василий Иликбаевич ден Шалипа Шуматбаевна Калегин ялыште илат. Нуно 54 ий ончыч ешым чумыреныт. Мўндыр Воронежский областьыште палыме лийыныт, тыште коктынат кўртньыгорнышто пашам ыштеныт. Василий Иликбаевич электрик-высоковольтник лийын тыршен, а Шалипа Шуматбаевна – корным оптымо шотышто бригадыште. Теве икана тудо кўшычын палыме, марла йылме дене кутырышо ўдырын йўкшым колын. Тудын дене палыме лияш шонен да Шалипа Шуматбаевнам кушташ ўжын. Тылеч вара нуно илыш корно дене пырля ошкылыт. Шочмо Башкирийыш пӧртылыныт. Шалипа Шуматбаевна ятыр ий Калегин фельдшерско-акушерский пунктышто пашам ыштен, а пытартыш ийлаште сулен налме канышыш лекме марте Калегин СДК-ым арулыкышто кучен. Василий Иликбаевич «Россия» озанлыкыште электрик, комплексный бригадыште бригадир лийын тыршен, а 1982 ий гыч Калегин СДК-ым вуйлатен. Тудо кызытат общественный илыш дене ила – верысе ветеранмыт организацийым вуйлата. Нунын тўҥ еш капиталышт – эргышт, кок уныкашт да уныкаштын икшывышт.

Почетан медаль дене пырля район администраций деч таум каласымаш серыш ден шарнымаш пєлекым налыныт.

Эше ик мужырым – Калтаса села гыч Абазовмытым – еш пайремыште палемденыт. Фируза Идиятовна ден Назиб Набиевич тений пырля илыме 50 ияш шӧртньӧ юбилейыштым палемдат. Нунылан республике вуйлатыше деч саламлымаш адрес ден пӧлекым, район администраций деч таум каласыман серыш ден шарнымашеш кодшо пӧлекым кучыктеныт. Вате-марий Бурай район гыч улыт, Калтаса кундемыште палыме лийыныт. Тыште Назиб Набиевич пашам ыштен да Фируза Идиятовнат ты кундемыште тыршаш тўҥалын. Палыме лийме деч вара кок ий гыч самырык еҥ-влак мужыраҥаш лийыныт. 1969 ий 17 июльышто Калтаса ялсоветыште шке мужырыштым регистрироватленыт. Ришат эргышт, Альбина ўдырышт шочын. Кызыт кова ден коча вич уныка да кугезе уныкалан куанен илат. Фируза Идиятовна ўмыржӧ мучко Калтаса РайПО-што сатучо лийын пашам ыштен. Тудын пелашыже шке водитель профессийжылан ўшанле лийын кодын, организаций-влак гына вашталтыныт: леспромхоз, НЭС, Калтаса ветстанций. Нунын пашашт Чап грамота да таум каласыман серыш-влак дене чапландаралтыныт.

Еш мужыр-влакым саламлышыла район администраций вуйлатыше Ю.М. Садыров кузе палемден, Еш, йӧратымаш да ўшанле улмо кече ик эн тўҥ поянлык нерген ушештара – тиде икте-весым пагалымаш да ўшанле улмаш, пырля чыла нелылыкым чытен лекмаш, еш да ешыште туныктымо паша нерген ойла. «Еш, тургыжланымаш, келшымаш да йӧратымаш – айдемылан ик эн тўҥ эҥертыш, а еш – тиде мемнан тылна. Ешыште ме пиалын мо тугай улмыжым умылена», – каласен Юрий Минзарипович.

Район вуйлатыше Фарраховмыт ешлан шочшо ўдырыштын икымше документыштым кучыктен. Изи Ясмина тений мемнан районышто шочшо шўдымшӧ аза лийын. Азат ден Гузель Фарраховмыт Калтаса селаште илат, изи Ясмина деч посна нунын Ринат эргышт ден Лейла ўдырышт уло. Нуно ынде шуко икшыван еш-влак радамышт пуреныт.

Калтасасе юбиляр-влакым да Фарраховмыт шуко икшыван самырык ешым Калтаса ялсоветын пашажым виктарыше Н.В. Иксанова саламлыш. Культура пашаеҥ-влак концерт номерым ямдыленыт. Пайремыш толшо-влаклан Кристина Русиеван, Ольга Алкаеван, Ирина Карасеван, Лилия Матвееван, «Эрви» калык куштымаш ансамбльын солистше-влак Ляйсан Ямурова ден Виктор Ванюшкинын выступленийышт моткоч келшен. А библиотека пашаеҥ-влак вис-вис пеледыш дене мужедаш темленыт: кажне лышташыште йодыш лийын.

С. Аркадьева.