Петро кече – кеҥеж рӱдӧ

Ты кече, ойлат, юзо виян. Ты йӱдым пеледалтше апашудым (петров-крест, горечавка) муын, вожшыге лукман.

Тудо ойго деч утара да поянлыкым муаш полша, маныт. Ӱдыр-влак, ончыкылык пелашыштым омышто ужаш шонен, 12 тӱрлӧ пеледышым 12 олыкышто поген, кӱпчык йымакышт пыштеныт. Ожно Петро марте шудым солен огытыл, куатше огеш лий маныныт.

Чиймарий-влак, отыш лектын, Юмылан кумалыныт. Вара Сӱрем пайремым палемденыт.

Черкыш коштшо-влак, поснак колызо-влак, апостол Петрлан молебеным заказатленыт, колым кучымо перкелыкым йодыныт. Вет апостол Петр – колызо-влакын аралышыже.

Петро пайрем годым родо-тукым дек унала коштыт, тукым кылым пеҥгыдемдаш йӧнан пагыт.

Таза, пиалан лияш манын, Петро кечын кум памаш вӱд дене мушкылтман, йӱштылалтман.

Ты кече дене кылдалтше калык пале-влак

– Ожно Петро кече деч вара гына шудым солаш тӱҥалыныт.

– Куку Петро кече деч арня ончыч мурымым чарна гын, теле эр толеш; Петро кече деч вара ик-кок арня мура гын, теле вара толеш.

– Петро кече деч вара эн шокшо кече-влак тӱҥалыт.

– Петро кече деч вара пушеҥге гыч лышташ велаш тӱҥалеш.

А. Зайнетдинова.