ДРСУ-ын автопаркше уэмдалтеш

Эртыше арнян районысо корно пашаеҥ-влак у техникым налыныт

Корно-влакым чоҥаш, олмыкташ шагал огыл паша да окса кӱлеш. Келшыше технике деч поснат ок лий. Кольмо да кирка дене ожсо семын чыла пашам ышташ лиеш мо? Калтаса ДРСУ-што технический парклан кугу тӱткышым ойырат, машина-влак тӱз лийышт манын, шкешт деч шогышыжым чылажымат ыштат. Теве «Башкиравтодор» предприятийлан корно-коммуналь у машинам ойыра – МТЗ-82 трактор ден Камаз – 55111 автосамосвал.

– Нине у машина-влак дене пырля мемнан автопаркыште тӱрлӧ 30 корно технике уло, – ойла предприятийын механикше Марат Галимов. – Корно озанлыкыште талук мучко паша шуко. Кызыт теве чоҥымо-олмыктымо сезон мия. Кушто дыр у корно полотном пыштена, кушто дыр олмыктена, корно тӱрлаште шудым солена, вондер-влакым руэна, тура корно савыртышыште да кӱварыште авыртыш-влакым олмыктена, чиялтена. А телым гын йӧршеш вес паша – корнылам лу деч эрыктена. Сай технике улмо годым гына ты сомылым жапыштыже шукташ лиеш. Сандене предприятийыш пурышо кеч-могай у техникылан ме йывыртена.

Калтаса ДРСУ региональ, межмуниципаль да межпоселенческий корно-влаклан вуйын шогат. Тиде чылаже 357 километр уштыш. Талукын кеч-могай жапыштыже, кеч-могай игечын нуно тӱз лийшаш улыт. Сандене иктаж-могай проблеме лектеш гын, корно пашаеҥ-влак нуным икымше сигнал почеш кораҥдаш тыршат. А олмыктымо паша палемдыме график почеш мия.

Марат Галимов кузе палемда, ДРСУ-што пашам тыршен ыштышан коллектив ышта, тракторист-машинист, водитель-влак чыланат уста профессионал улыт. Тудо Асхат Тазитдинов нергенат сайым гына ойла. Тудлан коммуналь-корно машина, тиде МТЗ-82 тракторым, ӱшанен пуэныт. Асхат Аглямович корно озанлыкыште куд ий тырша. Тылеч ончыч Краснохолмский УТТ-ште 30 ий утла пашам ыштен, тӱҥалтыште – бульдозерист, вара – погрузчик лийын. Усталыкше тудын ятыр.

– Пашам йӧратышан, вуйын шогышан, технике ден пашажым вич парняж гай сай пала, – Марат Галимов тудын нерген тыге ойла.

Камаз автосамосвалым уста водитель Сергей Тимирбаевлан ӱшанен пуэныт. У технике ӱшанле кидыште. Тек тудо районлан эше кужу жап пашам ыштыже.