Орхидей молан ок пелед?

Фаленопсис орхидей – пӧлемыште кушшо ик эн мотор пеледыш. Тудым кевытыште чаткан пеледалтшымак ужалат. Налме але пӧлеклыме пеледыш йылме йоген пытыме жап толын шумеке, мом йоҥылыш ыштенам манын, оза-влак шонат.

Такшым гын орхидейын пеледме жапше – 3 тылзе. Сайын ончымо кушкыл идалыкыште кок але кум ганат пеледалтын сеҥа.

Пеледме жапшым лишемдаш да тудым чӱчкыдын пеледыкташ мом ыштыман?

Шогымо верым температурым писын вашталтен пеледаш таратыман. Пеледыш кӧршӧкым йӱдлан (15 градус марте) юалге верыш кораҥдыман. Пуымо ӱяҥдышысе азотым шагалемдыман, а фосфорым, мӧҥгешла, шукырак ешараш лиеш. Вет лачшымак ты вещества кушкылым веле огыл, пеледаш ситале куатым пуа.

Кушкыл йырысе южым чӱчкыдынрак вӱдыжтарыман.

Орхидей кӧршӧкым 5 кечылан пычкемыш верыш шындыман. Тыге ыштыме деч вара тудо пеледышлыкым лукшаш. Но ты йӧн кугу да таза кушкыллан гына келшен толеш.

Вӱдым оптымо олмеш кӧршӧкыш икмыняр изи моклака ийым пышташ лиеш, тыге тудо жап деч икмыняр кечылан ончыч пеледалтшаш.

Пеледдыме орхидейын лышташыже але кӧршӧк тӱр гыч чараш лектын шогышо вожшо шукемын кушкыт, тугеже тудын ужарген вияҥме пагытше. Ты жап эртымешке, кушкыл пеледышлык «пучым» ок лук, огеш пелед.