Вӱд йоҥылышым ок проститле

Республикыште вӱдеш пураш тӱҥалме сезоным почмо деч вара, оперативный данный почеш, 42 еҥ пурен каен колен, тидын годым 5 икшыве

Вӱд воктене лӱдыкшыдымылык нерген йодыш-влаклан Башкортостан Республикын кугыжаныш комитетын вуйлатышыже Фарит Гумеров вашешта.

– Тений вӱдеш пурымо сезон кузерак эрта?

– Чаманен каласаш логалеш, вӱдеш пурымо сезоным почмо икымше кече гычак Бурзян районышто Ош Виче эҥерыште 7 ияш эрге вӱдеш пурен каен колен. Вӱдыштӧ лийме туткар нерген арня еда случай-влак лиедат. Тыште изижат, кугыжат вӱдеш пурен каен коленыт.

Июньышто арня ыле, кунам вӱд гыч 11 еҥын колышо капшым луктыныт. Шокшо игече-влак эше лиедат. Кажне ийын ты жапыште еҥ-влак вӱдеш пурен каен колат.

Ты случай-влак тӱҥ шотышто вӱдеш пураш лӱмын ыштыме верлаште огыл лийыныт. Сандене вӱдыштӧ пураш лийме верлаште гына йӱштылалташ лиеш. Республике территорийыште 75 пляжым гына пайдаланымашке пуымо. Нунын кушто верланымыштым интерактивный сайтыште ончалаш лиеш. Тидлан республике кугыжаныш комитетын чрезвычайный ситуаций шотышто сайтышкыже пурыман.

– Кеҥеж толмо дене чыланат вӱд воктеке колым кучаш каят. Колым кучымаште лӱдыкшыдымылык шотышто мом каласен кертыда?

– Июньышто лийше кум примерым конден кертам. Икымше случайыште, тидыже 7 июньышто лийын, Иглин районысо Кудеевка села воктене карьер гыч колышо пӧръеҥым луктыныт. Тудо колым кучымыж годым вӱдыш шӱҥгалтын да пурен каен.

Кокымшо сулчай тений 8 июнышто Илиш районысо Груздевка села деч мӱндырнӧ огыл лийын. Ош Виче эҥерыште колым кучымо годым кум пӧръеҥ пуш дене кумыкталтын. Тиде проишествийым ужшо еҥ-влак иктыжым утареныт, кокымшыжо бакеныш пижын, тудым мемнан спасательна-влак муыныт да серыш луктыныт. Кумшо пӧръеҥым водолаз-влак вӱд йымалне муыныт.

Кумшо случай 9 июньышто Уфа районысо ерыште лийын. 9 ияш эрге колым кучымыж годым эҥырже дене электропередаче линийыш пижын. Икшыве электрический ток деч колен.

Колым кучымо годым ий еда туткар-влак лиедат. Сандене колым кучымо годым лӱдыкшыдымылык правил-влак нерген ида мондо, вӱд воктене аракам ида йӱ.

– Тендан чрезвычайный ведомствыда вӱдеш пурымо лӱдыкшӧ вер-влак шотышто учетым намия мо?

– Вӱдеш пурымо сезонышто тӱҥ шотышто Ош Виче эҥерыште колат. Тыште кажне кудымо еҥ вӱдеш пурен кая. Моло случай-влак ер, пӱя да карьере дене кылдалтыныт.

Вӱдеш пурен колышо-влак коклаште шукыжым пӧръеҥ-влак – 90 утла процент. Эртыше ийынат тыгак лийын: 78 пӧръеҥ, 2 ӱдырымаш да 6 йоча вӱдыш пурен каен колен.

– Кеҥыжым вӱдыштӧ могай туткар-влак лиедат?

– Кум тӱҥ ойыртемым каласем:

- икымше, вӱден пурымо сезонышто 80 утла процентше йӱшӧ вуя йӱштылалтмылан кӧра колат;

- кокымшо, кеҥежым вӱдыш транспортный средства-влакын сӱмырлымышт туткарыш кондат. Мутлан, эртыше ийын 6 июльышто Краснокам районышто Саузово ерыште 3 еҥ гыч шогышо еш легковой автомобиль дене пырля вӱдыш пурен каен колен.

- кумшо, колым кучымо да плавсредства-влак дене коштмо годым туткар-влак лиедат. 21 июньышто Дӧртыльӧ районышто моторный пуш дене коштмо годым 10 ияш эрге вӱдыш шӱҥгалтын да пушын винтше вуйжым сусыртен.

– Вӱдыш пурымо сезонышто туткар-влак деч могай профилактика паша мия?

– Оборудоватлыме пляжлаште спасатель-влак дежуритлат. Нуно Уфа олаште гына 17 еҥым утареныт.

Кажне кечын спасатель-влак профилактике рейдыш лектыт. «Дикий» пляж манме верлам текшырат, ик жаплан спасательный пост-влакым вераҥдат. Профессионал спасатель-влак дене иктӧр пашам ыштат. Каныше-влаклан спасатель-влак манекеныште икымше полышым ончыкташ кузе кӱлмӧ нерген ончыктат да ойлат.

– Вӱдыш пурымо годым шкем кузе кучыман?

– Сай каналташ манын палыдыме верлаште ида йӱштылалт, оборудоватлыме пляж-влакым гына ойырен налза, палыдыме верлаште вӱдыш ида тӧрштӧ, шкет ида йӱштылалт, сер деч мӱндыркӧ ийын ида кае, йӱшӧ вуя вӱдыш ида пуро.

Йӱшӧ вуя вӱдыш пурымылан административный штраф пышталтеш. Тиде 3 гыч 5 тӱжем теҥге марте.

Эн тӱҥжӧ – ача-ава, коча-кова-влаклан! Икшыве-влакым эҥерыш, ерыш да пӱяш вӱдеш пураш шкетыштым ида колто. Ушештарена, тений вӱдыш пурен кайыше 5 икшыве кугыеҥ-влак деч посна лийыныт.

Вӱдыштӧ йӱштылалтме правил-влак проста улыт, а тудым текшырыдымаш – айдемын илышыже. Тыгак вӱд йоҥылышым ок проститле.