Кугезе йӱла изи яллашкат пӧртылеш

Шукерте огыл Калтаса районысо изи Васола ялыште Кугу Кӱсӧ кумалтыш эртен. Кумалтышым республикысе марий-влак коклаште сайын палыме, Пошкырт кундемын кугурак картше Геннадий Пастиев эртарен.

Тудлан У Пураялысе марий кумалтыш община вуйлатыше Олег Байдуганов, У Пураялын онаеҥже Вячеслав Афкаликов, тӱҥалше онаеҥ Виталий Искаков да марий йӱла деке шӱман еҥ-влак Радислав Зайнетдинов, Федор Аплекаев, Владислав Дмитриев,Игнатий Тимирьянов полшеныт.

Васола ялысе кӱсотым кодший почынна. Тиде отышто кумалтыш кудло утла ий эртаралтын огыл. Но верысе калык кумалтыш верым шарнен илен да ожсо йӱлам пӧртылташак тыршен. Тений шонымашна шукталте – погынен кӱсотышко лекна.

Кумалтыш деч икмыняр жап ончыч кӱсотым эрыктенна да тӱзатенна, кӱлеш арвер-влакым ямдыленна. А 7 июльышто кӱсотышто уэшын юзо тул ылыже да кавашке порсын шӱртыла канде шикш нӧлтӧ. Кумалтышке 30 наре еҥ погынен. Васола ял калык деч посна Юмылан вуйым саваш Янаул район, Нетекамск, Когалым олала, Калтаса села, Калмиябаш, Павасола ялла гыч толыныт.

Изи яллаштат марий йӱла пӧртылмаш куандара. Ме вес калык коклаште илена гынат, шочмо йӱлам кучен, шочмо йылме дене мутланен да кугезе сугыньым шуктен илаш тыршена.

Р. Зайнетдинов.