Калтаса села гыч футбол команде районын чемпионжо лийын

Футбол дене районын чемпионатше мучашлалте. Тыште куд команде участвоватлен. 20 очком поген калтасамыт сеҥышыш лектын. Амчемучаш ял команде 17 очко дене кокымшо лийын. Тынарак очком Шоръял команде чумырен, но личный вашлиймаште нуным амчемучашмыт кок гана сеҥеныт. Сандене Шоръял команде бронзым гына налын.

Чемпионат тӱҥалтыште кӧмыт сеҥымым вигак каласаш неле лийын. Нине куд команде гыч кажныже сеҥен кертын. Нуно чыланат иктӧр модыныт. Эртыше ийлаште ныл команде, тений первенствыште участвоватлыше-влак, тиде титулым налыныт лийын. Кодший Ачмемучаш ял команде чемпион лийын, ончылий – шоръялмыт, тылеч ончыч – калтасамыт ден келтеймыт.

Первенствын икымше кругышто кучедалмаш тале лиймым ончыктен. Ныл команде икгай очком поген. Ныл очкылан нуным амчемучашмыт ончылтен. Тиде сеҥымашке лекташ йодмашым пуымо манын каласаш лиеш. Но кокымшо кругышто кодшо вич мачтыште Амчемучаш ял команде шагалрак голым пуртен. Нуно начар модын огытыл, можыч соперник-влак сайрак модаш тӱҥалыныт. Теве холммыт команде икымше кругышто кум очком гына поген, а чемпионатын кокымшо пелыштыже амчемучашмытым сеҥеныт. Нуно тыгак келтеймыт дене модмо годым сеҥышыш лектыныт. Мут толмашеш, Келтей ял команде кокымшо кругышто начар модаш тӱҥалын, ик очкомат поген огытыл, чыла матчым модын колтен. А Калтаса села команде икымше кругым келтеймыт дене иктӧр модыныт, кокымшышто ныл матчым сеҥен да иктыштыже нигӧн сеҥыдыме лийын.

Район чемпионатын иктешлымаш таблицыже тыгай лийын: Калтаса селасе команде – 20 очко, Амчемучашмыт – 17, Шоръял команде – 17, Савакмарий – 16, Краснохолмский – 9, Келтей – 7 очко.

Первенствыште Калтаса села гын нападающий Виктор Акушев эн сай модшылан шотлалтын. Тудо соперникын вороташкыже 10 голым пуртен. Тидыже кажне матчыште ик гол дене миен лектеш. Чынжым каласаш гын, ик вашлиймаште тудо модын огыл. Виктор пытартыш матчыште шоръялмыт дене модмо годым кок голым пуртен.

Чемпион ден призер-влакым сеҥымаш дене саламлена! Тыгай ояр модмашлан кугу тау. Шушаш ийынат район чемпионатыште участвоватлаш тыланыше команде-влак шукырак лийыт манын ӱшаныме шуэш.